Hukumat qarori bilan Yoshlar sanoat va tadbirkorlik zonasi hamda Yosh tadbirkorlarni qo`llab-quvvatlash jamg`armasi to`g`risida nizomlar tasdiqlandi.
Nizomga ko`ra, yosh tadbirkorlik sub`ekti 18 yoshga to`lgan va 30 yoshdan oshmagan hamda yuridik shaxs maqomida yoki ta`sischilari sifatida sanoat yoki xizmat ko`rsatish yo`nalishida investisiya loyihasini amalga oshirish istagini bildirgan O`zbekiston fuqarolari hisoblanadi.
Yoshlar sanoat zonalari faqat muhandislik-texnik kommunikasiyalari mavjud bo`lgan yoki o`tkazish oson bo`lgan, faoliyat ko`rsatmayotgan ishlab chiqarish maydonlari va qishloq xo`jaligiga mo`ljallanmagan er maydonlarida tashkil etiladi.
Yoshlar sanoat zonalarida o`z investisiya loyihalarini joylashtirish istagida bo`lgan yosh tadbirkorliklar tegishli hujjatlarni tuman (shahar) investisiyalar va tashqi savdo bo`limlariga taqdim etadi.
Investisiya loyihalarini joylashtirish to`g`risida ishchi guruh qarori hujjatlar taqdim qilingan kundan boshlab 10 kalendar kun ichida qabul qilinadi hamda bu haqda ijobiy yoki rad etish to`g`risida xulosa berilishi shart.
Quyidagi talablarga javob beradigan investisiya loyihalari Yoshlar sanoat zonalari hududida joylashtirishda ustuvorlikka ega bo`ladi:
● patent asosida ishlab chiqarishni yo`lga qo`yishni ta`minlovchi startap - investisiya loyihalari;
● innovasion mahsulotlar ishlab chiqarishga mo`ljallangan investisiya loyihalari;
● import o`rnini bosadigan va eksportga yo`naltirilgan raqobatbardosh mahalliy sanoat mahsulotlari ishlab chiqarishni nazarda tutuvchi investisiya loyihalari;
● yaratiladigan yangi ish o`rinlarining kamida 70 foizi yoshlar uchun mo`ljallangan bo`lishi, bunda bandligi ta`minlanmagan “Yoshlar daftari”ga kiritilgan yoshlarni ish bilan ta`minlashni nazarda tutuvchi investisiya loyihalari.
Investisiya loyihasini joylashtirish uchun er maydonlari chegaralarini belgilab berish Davlat soliq qo`mitasi huzuridagi Kadastr agentligining tegishli tuman (shahar) bo`limlari tomonidan ishchi guruhlarning xulosalari asosida 5 ish kuni ichida amalga oshiriladi.
