14-may kuni O`zbekiston Prezidenti Shavkat Mirziyoev Respublika ixtisoslashtirilgan onkologiya va radiologiya ilmiy-amaliy tibbiyot markaziga tashrif buyurib, u erda davolanayotgan bolalar bilan suhbatlashib, ularning ota-onalariga dalda berdi. Tashrif doirasida bolalar davlat rahbari bilan o`z qiziqishlarini o`rtoqlashib, ulardan biri sportning shaxmat turiga qiziqishini ma`lum qildi.
15-may kuni Prezident topshirig`iga muvofiq ushbu shifoxonada davolanayotgan bolalarga shaxmat dosakalari sovg`a qilindi, soha mutaxassislari bemor bolalar shaxmat o`ynashdi hamda o`z tajribalari bilan o`rtoqlashishdi. Bemor bolalar hamda ularning ota-onalari bundan behad quvonib, o`zlarining qiziqishlari va orzulari bilan bo`lishishdi.
Prezident bilan uchrashuv chog`ida shaxmatga qiziqishi haqida aytgan Saidjon Salimjonov Farg`ona shahridagi 28-maktabning 3-“A” sinfi o`quvchisi bo`lib, darslardan keyin shaxmat bilan shug`ullangan va professional shaxmat haqida orzu qilgan.
“O`g`lim kichik yoshligidan shaxmatga qiziqqan, o`yinchoqlarini terib qo`yib, shaxmat o`ynamoqchi bo`lardi. Uning bu qiziqishlarini ko`rib, dadasi shaxmat taxtasini olib kelgan. 5 yoshdan oshganida Farg`ona shahridagi shaxmat to`garagiga olib borib, isteʼdodli murabbiy Adhamjon Eminovga shogirdlikka berdik. Keyinroq Farg`onada Toshkent shaxmat akademiyasi filiali ochildi, ayni damda Saidjon o`z yosh toifasida shu akademiya o`quvchisi hisoblanadi, murabbiy Ravil Vinerovich unga ustozlik qilmoqda. Qator shahar va viloyat darajasidagi musobaqalarda ishtirok etdi, o`tgan yili o`tkazilgan shaxmat musobaqasida ishtirok etib, shahar bosqichida ham, viloyat bosqichida ham 1-o`rinni egalladi va respublika bosqichiga yo`l oldi. Biroq kutilmaganda tobi qochib, shifoxonaga tushib qoldi, unga jigar xavfli o`smasi tashxisi qo`yildi va shu sabab musobaqaga bora olmadi”, - dedi Saidjonning onasi Maxliyo Ziyoeva.
Shu o`rinda, Maxliyo Ziyoeva shifokorlarga minnatdorchilik bildirib, o`g`lining operasiyalari muvaffaqiyatli o`tgani va hozir operasiyadan keyingi davolanish muolajalari olinayotganini ma`lum qildi.
“Kecha hurmatli yurtboshimiz shifoxonaga tashrif buyurdilar, bu erdagi barcha bolalar va onalarning qalblariga umid va quvonch olib keldilar. Saidjon ham kechadan beri “Oyi, shaxmat haqidagi orzularim amalga oshyapti” deb behad xursand, kasalligini ham unutib qo`ydi. Mana bugun bizga Prezidentimiz nomidan professional shaxmat doskasini sovg`a qilishdi, shaxmat bo`yicha murabbiy biriktirishdi o`g`limga, professional shaxmat doskasidan tashqari, shaxmat bo`yicha barcha dasturlar jamlangan kompyuter ham sovg`a qilishlarini eshitib, boshimiz ko`kka etdi. Yurtdoshimizga bunday sharoitlar hamda eʼtibor uchun mingdan ming rahmat. Nasib etsa, farzandim o`zining sevimli mashg`uloti shaxmat bilan shug`allanishni davom ettiradi hamda Osiyo va Jahon chempionatlarida ishtirok etib, O`zbekiston bayrog`ini baland ko`taradi”, - deya qo`shimcha qildi Saidjonning onasi ko`zlariga yosh olib.
Markazda davolanayotganlar orasida shaxmatga qiziqadigan bolalar ko`pchilikni tashkil qilar ekan. Shulardan yana biri Jizzax viloyatidan kelgan - Jasurbek Abdug`aniev bo`lib, u ham qiziqishi va orzulari bilan o`rtoqlashdi. “Shaxmat to`garagiga Jizzaxdagi sinfdoshim bilan borganman, o`sha vaqtdan boshlab qiziqishim ortgan. Tuzalib ketsam, shaxmat bilan shug`ullanishni davom ettirib, yaxshi o`qib, yaxshi ishga joylashib, ota-onamga yordam berib uy olish orzuim bor”, - deydi u. Ozoda Eshmirzaevaning ma`lum qilishicha, o`g`li Jasurbek shaxmatga 1 yildan ortiq vaqt davomida shaxmat to`garagiga qatnashgan.
“Men futbolga qiziqaman, Ispaniyaning “Barselona” klubi o`yinlarini sevib tomosha qilaman. Katta bo`lsam, ichki ishlar xodimi bo`lishni, milisiya formasini kiyishni orzu qilaman”, - deydi yana bir bemor – buxorolik Ozodbek Fayziev.
Buxoroning Olot tumanidan kelib, markazda davolanayotgan Temurbek Botirov esa do`stlari bilan sport maydonlariga borishi, u erda turli jismoniy mashg`ulotlar bilan shug`ullanishini aytdi.
“Kompyuterda dasturlashtirishga ham juda qiziqaman. Bundan tashqari, turli predmetlardan konstruksiyalar yasashni yaxshi ko`raman. Ulg`ayganimda nasib etsa, arxitektor bo`lmoqchiman”, - qo`shimcha qildi u.
Xulosa qilib aytganda, shifoxonadagi bolalarning qiziqishlari va orzulari bir olam. Bemor bolalarning ota-onalarining ta`kidlashicha, davlat rahbarining tashrifidan keyin farzandlarining ertangi kunga bo`lgan umid va ishonchlari yanada kuchaygan.
