Avvalroq, Samarqand viloyati Pastdarg`om tumanida kanaldan 17 yoshli qizning murdasi popilgani haqida xabar qilgan edik. Samarqand viloyati prokuraturasi holat yuzasidan Rasmiy bayonot berdi.
2021 yil 11 may kuni Pastdarg`om tumani, “Chandir” mahallasida yashovchi R.X. tuman prokuraturasiga ariza bilan murojaat qilib, voyaga etmagan 2004 yilda tug`ilgan S.X. yashash uyidan chiqib ketib, qaytib kelmasdan bedarak yo`qolganligini bildirib, uni topishga amaliy yordam so`ragan.
Tuman prokuraturasi boshchiligidagi tergov-tezkor guruhi tomonidan zudlik bilan olib borilgan tergovga qadar tekshiruv harakatlari davomida 12 may kuni S.X.ning murdasi tumanning “Do`stlik” mahallasi hududidan oqib o`tuvchi “Eski Anhor” kanalidan topilgan.
S.X.ning bedarak yo`qolib, o`lik holatda topilganligini holati yuzasidan xizmat tekshiruvlari va sudga oid tibbiyot ekspertizasi tayinlanib, voqeani bevosita guvohi bo`lgan yoki undan xabardor bo`lgan shaxslar doirasini aniqlash va ulardan tushuntirish olish ishlari olib borilmoqda.
Sud tibbiy ekspertizasining dastlabki ma`lumotiga ko`ra, marhumaning o`limi, suvga cho`kishdagi mexanik asfiksiyadan kelib chiqqanligi, S.X.ning qizlik pardasi butunligi, buzilmaganligi, qizlik pardasini buzmasdan turib jinsiy aloqa qilishning imkoni yo`qligi, shuningdek, marhumaning jinsiy a`zolarida tan jarohatlari aniqlanmagan.
Hozirda, holat bo`yicha Pastdarg`om tuman prokuraturasi tomonidan tergovga qadar tekshiruv harakatlari davom ettirilmoqda, tekshiruv harakatlari viloyat prokuraturasi tomonidan nazoratga olingan.