Har yili an`anaviy tarzda respublikamiz bo`ylab Adliya vazirligi qoshidagi “Adolat” milliy huquqiy axborot markazi tomonidan nashr etilayotgan huquqiy adabiyotlarning ko`rgazma-yarmarkalari tashkil etiladi.
Ana shunday ko`rgazma-yarmarkasi viloyat adliya boshqarmasi bilan hamkorlikda Namanganda tashkil etildi. Unda huquqni muhofaza qiluvchi idoralar mas`ul xodimlari, Namangan davlat universiteti hamda yuridik texnikum o`qituvchi va talabalari ham ishtirok etdi.
O`zbekiston Respublikasi kodekslari, “Bolalar uchun yuridik ensiklopediya”, “Yoshlar uchun yuridik ensiklopediya”, “Ayollarga huquqiy madad” nomli amaliy qo`llanmalar va bir qator huquqiy adabiyotlar ko`pchilikda qiziqish uyg`otdi.
Ushbu ko`rgazma-yarmarkada shunchaki vaqtini bekor o`tkazuvchilar emas, balki real xaridorlar, sohaning chinakam bilimdonlari va fidoyilari, kitobni chindan qadrlovchilar ishtirok etgani quvonarli.
Huquqiy adabiyotlar ko`rgazma-yarmarkalari viloyatimiz bo`ylab davom etadi.
