Xalq ta`limi vazirligi maktablarda “So`nggi qo`ng`iroq”ni ko`tarinki kayfiyatda va ortiqcha harajatlarsiz o`tkazishni so`raydi, deb yozadi vazirlikning Matbuot xizmati.
Ma`lumki, har bir o`quv yili yakunida 25 may kuni barcha maktablarda “So`nggi qo`ng`iroq” tadbirlari tashkil etiladi.
Xalq ta`limi vazirligi tomonidan joriy yilda ham umumta`lim maktablarini bitirayotgan 438 mingga yaqin bitiruvchilarimiz uchun mazkur tadbirni karantin qoidalariga qat`iy rioya etgan holda o`tkazishga ruxsat berildi.
Ota-onalar va maktab ma`muriyatlaridan ushbu tadbirni farzandlarimiz uchun faqat ijobiy kechinmalar bilan eslanadigan qilib, ko`tarinki kayfiyatda o`tkazishni iltimos qilamiz.
Shu bilan birgalikda, joylarda turli e`tirozlarni oldini olish maqsadida tadbirlarni ortiqcha harajatlarsiz, xususan o`quvchilar orasida oilaviy sharoitidagi farqni salbiy ko`rsatishga sabab bo`lishi mumkin bo`lgan turli hil alohida kiyim-kechak, bezak, sovg`alar va shu kabilarga katta mablag` sarflamasdan bir-birini qo`llab-quvvatlagan holda o`tkazishlarini so`raymiz.