Ayollar orasida keng ko`lamli birlamchi tekshirishlarni amalga oshiradigan “Onko-nazorat” xonalari tashkil etiladi
Qarorga ko`ra, 2022 yil 1 yanvardan qizlar va ayollar orasida onkologik kasalliklar tarqalishining oldini olish va erta diagnostika qilish quyidagi milliy dasturlar asosida amalga oshiriladi:
- 9–14 yoshdagi o`smir qizlarni odam papillomasi virusiga qarshi vaksina bilan emlash;
- 30–55 yoshdagi ayollar orasida bachadon bo`yni va 45–65 yoshdagi ayollar orasida ko`krak bezi saratoni skriningi.
2022 yil 1 yanvardan tuman (shahar) ko`p tarmoqli markaziy poliklinikalarining “Ayollar maslahatxona”lari tarkibida muntazam ravishda ayollar orasida keng ko`lamli birlamchi tekshirishlarni amalga oshiradigan “Onko-nazorat” (Cancer-nazorat) xonalari tashkil etiladi.
2021 yil 1 iyuldan:
- gematologiya, onkologiya, klinik immunologiya, transfuziologiya va shu sohadagi laboratoriya yo`nalishlari bo`yicha yosh mutaxassislarning xorijdagi etakchi ilmiy va tibbiyot markazlari ish joylarida malaka oshirishi va stajirovka o`tashi bilan bog`liq xarajatlar to`liq qoplab beriladi;
- bemorlarning onkologiya va gematologiyaga ixtisoslashtirilgan davlat tibbiyot muassasalari yo`llanmalari asosida pozitron-emission tomografiya tekshiruvidan o`tishi bilan bog`liq xarajatlari Davlat byudjetidan qoplanadi;
- onkologik va gematologik bemorlarning Qoraqalpog`iston Respublikasi va viloyatlardan respublika ixtisoslashtirilgan markazlariga temir yo`l va aviatransport vositalari orqali kelishi bilan bog`liq xarajatlar tegishli mahalliy byudjetlar mablag`lari hisobidan to`liq qoplab beriladi.
🖥 Shuningdek, gematologik, onkologik va irsiy immunologik kasalliklarga chalingan fuqarolarga ko`rsatilayotgan tibbiy xizmatlar samaradorligi va sifatini oshirish maqsadida bemorlarning elektron ro`yxatini yuritish tizimi joriy etiladi.
