O`zbekistonda xalqaro tajribadan foydalangan holda minimal iste`mol xarajatlari qiymatining dastlabki hisob-kitoblari amalga oshirildi. Bu haqda Iqtisodiy taraqqiyot va kambag`allikni qisqartirish vazirligi Axborot xizmati ma`lum qildi.
Minimal iste`mol xarajatlarini hisoblash uchun tajriba sifatida Jahon banki ko`magida 2020 yilda respublikaning barcha hududlaridan tanlab olingan 5 400 ta uy xo`jaliklarida so`rovnoma o`tkazilgan.
Bunda so`rovnomada ishtirok etgan uy xo`jaliklari xarajatlari miqdori bo`yicha o`nta guruhga ajratilib, ushbu oilalar orasidan eng kam xarajat (daromad)ga ega bo`lgan 30 foiz uy xo`jaliklari ajratib olingan.
So`rovnoma natijasida olingan ma`lumotlar asosida mazkur oilalarda jon boshiga kunlik iste`mol qilinadigan oziq-ovqat (2200 kkal) va zarur bo`lgan nooziq-ovqat tovarlar hamda xizmatlar uchun minimal iste`mol xarajatlar bir oyda kishi boshiga (joriy yildagi narxlar o`zgarishini inobatga olgan holda) kamida 440 ming so`mni tashkil etishi hisob-kitob qilingan.
Hisoblangan minimal iste`mol xarajatlarining jon boshiga to`g`ri keladigan yalpi ichki mahsulotga nisbati (YaIM) 26,8 foiz bo`lib, mazkur ko`rsatkich rivojlanayotgan mamlakatlarda asosan 4-20 foizni tashkil etgan.
Ma`lum qilinishicha, minimal iste`mol xarajatlarini hisoblash tajribasini yakuniga etkazish maqsadida 2021 yilda Davlat statistika qo`mitasi Jahon banki bilan birga 10 mingta uy xo`jaliklarida so`rovnoma o`tkazilmoqda. Mazkur so`rovnomalar natijasidan kelib chiqib, joriy yil yakuniga qadar minimal iste`mol xarajatlarni hisoblash metodologiyasini tasdiqlash va uni qayta hisoblangan miqdorini e`lon qilish ko`zda tutilmoqda.