Hukumat qarori bilan Voyaga etmagan shaxslarga jamoat tarbiyachilarini tayinlash to`g`risidagi nizom tasdiqlandi.
Nizomga ko`ra, jamoat tarbiyachilarining asosiy vazifasi nazoratsiz va qarovsiz qolgan hamda huquqbuzarlik yoki ijtimoiy xavfli qilmish sodir etgan voyaga etmagan shaxslar bilan yakka tartibda ishlash, shuningdek, ota-onasiga (yoki o`rnini bosuvchi shaxslarga) voyaga etmagan shaxslarni tarbiyalashda yordam ko`rsatishdan iborat.
Voyaga etmagan shaxslarning jamoat tarbiyachisi:
● 30 yoshga to`lgan;
● voyaga etmaganlar bilan kamida ikki yil ishlash tajribasiga ega;
● hayotiy tajribasi va axloqiy fazilatlari bilan voyaga etmaganlarga ijobiy ta`sir eta oladigan O`zbekiston fuqarosi bo`lishi kerak.
Voyaga etmagan qizlarga ayol jinsiga mansub jamoat tarbiyachilari tayinlanadi.
Jamoat tarbiyachisini tanlash va tayinlash haqidagi qaror Voyaga etmaganlar ishlari bo`yicha tuman (shahar) idoralararo komissiyasi tomonidan qabul qilinadi.
Quyidagi voyaga etmagan shaxslarga jamoat tarbiyachilari tayinlanishi mumkin:
- sud tomonidan majburlov choralari qo`llanilgan yoki ma`muriy huquqbuzarlik sodir etgan;
- ozodlikdan mahrum qilish jazosini o`tashdan muddatidan oldin shartli ravishda ozod qilingan;
- ixtisoslashtirilgan o`quv-tarbiya muassasalaridan qaytgan yoki tarbiya koloniyalarida jazoni o`tagan;
- nazoratsiz va qarovsiz qolgan voyaga etmaganlar;
- bolani tarbiyalashda yordamga muhtoj oilalarning voyaga etmagan farzandlari.
Yuklatilgan vazifalarni faol va vijdonan bajargan hamda ijobiy natijalarga erishgan jamoat tarbiyachilari BHMhning 5 baravarigacha (1 mln 225 ming so`mgacha) miqdorda bitta voyaga etmagan shaxs uchun bir martalik pul mukofoti bilan rag`batlantirilishi mumkin.
Voyaga etmagan shaxsga jamoat tarbiyachisi 3 oygacha muddatga tayinlanadi. Ushbu muddat Komissiya tomonidan jamoat tarbiyachisining hisobotini eshitish natijalariga ko`ra, bir marotaba ko`pi bilan uch oygacha uzaytirilishi mumkin.
