O`zbekiston Respublikasi Prezidenti Shavkat Mirziyoevning taklifiga binoan yurtimizga rasmiy tashrif bilan kelgan Pokiston Islom Respublikasi Bosh vaziri Imron Xon 16 iyul kuni Samarqand va Buxoroda bo`ldi. Bu haqda O`zA xabar qilmoqda.
Oliy martabali mehmonga O`zbekiston Respublikasi Bosh vaziri hamrohlik qildi.
Pokiston Bosh vaziri Samarqand bilan tanishuvni Imom Buxoriy majmuasini ziyorat qilishdan boshladi.
Qur`on tilovat qilinib, buyuk alloma yod etildi.
Islom olamida muhaddislar sultoni, deb e`zozlanadigan Imom Buxoriy merosini o`rganish va keng targ`ib etish, bu zot nomi bilan bog`liq maskanni obod etish borasida olib borilayotgan ishlarga yuksak baho berildi.
Imron Xon Amir Temur maqbarasi, Registon majmuasi, Mirzo Ulug`bek muzeyi va rasadxonasini borib ko`rdi.
Oliy martabali mehmonga mazkur obidalarning bunyod etilish tarixi, buyuk jahongir Amir Temur va temuriylarning davlatchilik an`analari, ilm-fan va madaniyat homiysi sifatida amalga oshirgan ishlari haqida ma`lumot berildi.
Registon maydonidagi Tillakori madrasasida namoyish etilgan milliy hunarmandchilik mahsulotlari, bu ishni davom ettirib kelayotgan usta-hunarmandlarning ishi Imron Xonda katta taassurot qoldirdi.
Pokiston Bosh vaziri yoshligidan Samarqand va Buxoroni ko`rishni orzu qilgani, Amir Temurning bunyodkorlik ishlarini katta qiziqish bilan o`rganganini alohida qayd etdi.
– Samarqand haqida, Amir Temur va temuriylar davlati, ularning bunyodkorlik ishlari haqida kitoblarda o`qiganim uchun biroz tasavvurga ega edim. Bugun kelib ko`rdimki, Samarqand men o`ylaganimdan ham tarixiy, go`zal va muqaddas shahar ekan. Uning har bir go`shasida tarixning, buyuk ajdodlaringiz aqlu zakovati, madaniyatining izi bor. O`zbekistonga tashrifim ana shunday unutilmas taassurotlarga boy bo`layotganidan xursandman. Biz Pokiston va O`zbekiston o`rtasidagi hamkorlik aloqalarini mustahkamlashga intilyapmiz va bu boshlanishi. Kelgusida aloqalarimiz keng ko`lamda, izchil davom etishiga ishonaman, – dedi Imron Xon.
* * *
Ma`lumki, Pokistonda O`zbekistonni, uning jahon tamadduniga katta hissa qo`shgan buyuk mutafakkirlari, xususan, Naqshbandiya tariqati asoschisi Bahouddin Naqshbandni yaxshi bilishadi. Shu bois har bir pokistonlik Buxoroning muqaddas joylarini ko`rishni orzu qiladi.
Pokiston Bosh vaziri Bahouddin Naqshband maqbarasini ziyorat qildi.
Mehmonlar majmuada olib borilgan bunyodkorlik ishlariga yuqori baho berdi.
Imron Xon Buxoro shahridagi Poyi Kalon majmuasida bo`ldi.
Kalon minorasi va masjidi XII va XVI asrlar oralig`ida bunyod etilgan. Bu obidalar Mir Arab madrasasi bilan uyg`unlashib, go`zal ansambl hosil qilgan. Ularning me`moriy echimi ajdodlarimiz madaniyati va san`atining yaqqol ifodasi sifatida bugun ham barchani hayratga solib kelmoqda.
Mehmonlar Mir Arab madrasasi bilan tanishdi. Shuningdek, mamlakatimizdagi eng qadimiy va yirik jome masjidlaridan biri bo`lgan Masjidi Kalonni ziyorat qildi.
Oliy martabali mehmon Buxoro shahrining tarixiy qismida zardo`zlik, zargarlik, gilamdo`zlik, kashtachilik, kulolchilik mahsulotlari ko`rgazmasi bilan tanishdi, Labi hovuz va uning atrofida joylashgan obidalarni tomosha qildi.
Qadimiy shaharning betakror qiyofasi, me`moriy obidalari, xalqimizning bebaho urf-odatlari Pokiston delegasiyasida katta qiziqish uyg`otdi.
Shu bilan Pokiston Islom Respublikasi Bosh vaziri Imron Xonning mamlakatimizga rasmiy tashrifi yakuniga etdi.