Shu kunlarda internet va ijtimoiy tarmoqlarda O`zbekiston musulmonlari idorasi raisi, muftiy Usmonxon Alimov hazratlarining salomatliklari to`g`risida turli xabarlar tarqalmoqda.
O`zbekiston musulmonlari idorasi Matbuot xizmati ushbu xabarlar asossiz va haqiqatga zid ekanini ma`lum qildi.
"Muftiy Usmonxon Alimov hazratlarining salomatliklarini yaxshilash uchun navbatdagi davolanish muolajalari amalga oshirilmoqda. Malakali tibbiyot mutaxassislari va shifokorlar tomonidan hazratning sog`liqlari muntazam kuzatib borilmoqda hamda davolanish bosqichlari o`tkazilmoqda. Alloh taologa shukrki, ayni paytda muftiy hazratlarining sihatlari barqarordir.
Odamlar orasida har xil asossiz va voqelikka to`g`ri kelmaydigan yolg`on xabarlarni tarqatish muborak Islom dinimizda gunoh sanalishi, qonunchilikda esa javobgarlikka sabab bo`lishini yana bir bor eslatamiz" deyiladi xabarda.
