Ayni payt Qarshi shahrida sport murabbiyi Elbek Rahimovning qotilligi yuzasidan matbuot anjumani bo`lib o`tmoqda. Unda Oliy sud raisi Kozim Komilov, bosh prokuror Nig`matulla Yo`ldoshev va ichki ishlar vaziri Po`lat Bobojonov qatnashmoqda.
Barcha so`zga chiqqanlar jinoyat bo`yicha qo`shimcha ma`lumotlar berishdi. Ichki ishlar vazirining aytishicha, jinoyatning tashkilotchisi hisoblangan Zuhriddin Boymirzaev 18 avgust kuni 17:05 da Chiroqchi tumanidagi yashiringan joyidan ushlangan. U jinoyat sodir etilgan kunda yashiringan. Ichki ishlar vaziri hozir barcha jinoyat ishtirokchilari qamoqqa olinganini ma`lum qildi.
Po`lat Bobojonovning aytishicha, jinoyat sodir etganlarning ikki nafari voyaga etmagan va jinoyat ishtirokchilarining deyali barchasi notinch oila farzandlari bo`lgan. Xususan, Boymirzaevning otasi o`z ukasining xotinini o`ldirib, qamoqda o`tirgani aytildi. Shuningdek, Boymirzaev qotillik tashkilotchisi bo`lgan boshqa bir yigit bilan bir uyda yashagan.
Bosh prokuror Yo`ldoshevning aytishicha, jinoyat sodir etilgan joydan pnevmatik to`pponcha o`qi topilgan. Shuningdek, gumanlanuvchilarning mashinasidan to`pponcha topilgan.
«Tergov ishlariga aralashishga hech kimning haqqi yo`q. Kim aybdor bo`ladi, men bilmayman. Lekin ularning ishi ochiq sudda ko`riladi va unda jurnalistu blogerlar bemalol qatnashishi mumkin bo`ladi», dedi Oliy sud raisi.
Bu ish bo`yicha sud ishi barcha uchun ochiq tarzda o`tkazilishini ma`lum qildi.
