Bugungi kunda koronavirus infeksiyasining er yuzi bo`ylab tarqalish sur`ati hanuz yuqoriligicha qolmoqda. Shu qatori, yurtimizda ham ushbu xavfli kasallik hali ortga chekingani yo`q.
Respublika Shoshilinch tibbiy yordam ilmiy markazi Toshkent shahar tez tibbiy yordam stansiyasi bosh shifokori Doniyor BO`RIBAEV shu bilan bog`liq savollarga javob berdi.
— Sentyabr oyi boshidan shu kungacha shahar “Tez yordam” xizmatiga qancha chaqiriq kelib tushdi?
— Avvalo shuni aytish lozimki, bugungi sinovli kunlarda mamlakatimiz tibbiyot xodimlari, xususan, “Tez yordam” xizmatining barcha brigadalari aholini koronavirus infeksiyasidan himoya qilish, bemorlarga o`z vaqtida sifatli tez tibbiy yordam ko`rsatish maqsadida tunu kun xizmat qilmoqda. Raqamlarga murojaat qilsak, sentyabr oyi boshidan ayni shu davrga qadar shahar tez tibbiy yordam stansiyasi CALL-markaziga bir kunda o`rtacha 3500 ta chaqiriq kelib tushdi. Jami murojaatlar soni esa 74 ming 260 tani tashkil etdi. Taqqoslash uchun aytsak, o`tgan yil sentyabr oyining xuddi shu davrida bu raqam 52 ming 541 ta edi.
— Ma`lumki, kuz faslida turli mavsumiy kasalliklar yanada avj oladi. Bu holat “Tez yordam” xizmati faoliyatiga qanchalik ta`sir etmoqda?
— Darhaqiqat, kuz kelishi bilan insonlarda turli mavsumiy xastaliklar – gripp va o`tkir respirator virusli infeksiyalar(O`RVI), nafas yo`llarining boshqa yuqumli kasalliklari ko`p kuzatiladi. Natijada organizmda immunitet pasayib, kasallik yuqtirishga moyillik yanada oshadi. Bu esa o`z-o`zidan bemorlar soni ortishiga ham sabab bo`ladi. Aytish lozimki, mazkur holat ayni paytda “Tez yordam” xizmati faoliyatiga ham ta`sir etib, chaqiruvlar soni ortishiga sabab bo`lmoqda. Bunga esa so`nggi kunlarda “103” xizmatiga bo`layotgan murojaatlar sonidan ham bilish mumkin. Xususan, keyingi 10 kunda (12-21 sentyabr) shahar “103” xizmatiga chaqiruvlar soni bir muncha ortishi kuzatildi. Xususan, shu davrda kunlik chaqiruvlar soni o`rtacha 3800 tani tashkil etib, jami murojaatlar 37 ming 435 taga etdi. Shundan tana harorati ko`tarilgan 12 ming 339 nafar hamda pnevmoniya belgilari kuzatilgan, koronavirusga gumon qilingan va PZR test musbat natija bergan 1063 nafar kishiga sifatli tez tibbiy yordam ko`rsatildi.
— Gripp va koronavirus infeksiyasidan himoyalanish uchun yurtdoshlarimizga qanday tavsiyalar berasiz?
— Avvalo shuni aytmoqchimanki, bugungi pandemiya sharoitida gripp va o`tkir respirator virusli infeksiyalarga ro`baro` bo`lmaslik har birimiz uchun juda muhim. Boisi gripp va pnevmoniya chaqiruvchi virusli xastaliklarning koronavirus bilan birgalikda kelishi bemorda kasallikning yanada og`ir kechishiga sabab bo`ladi. Shu bois, barchamiz, eng avvalo, yurtimizda o`rnatilgan karantin qoidalariga qat`iy amal qilishimiz lozim. Qolaversa, aholidan koronavirus infeksiyasi va grippga qarshi emlash tadbirlarida faol qatnashishlarini so`rayman. Bu esa mamlakatimizda epidemik vaziyat barqarorligini ta`minlash, o`zimiz va yaqinlarimiz salomatligini asrashda muhim sanaladi. Shuningdek, kimda shamollash va koronavirus infeksiyasi belgilari kuzatilsa, avvalo, oila shifokoriga murojaat qilishlari va mutaxassis tavsiyasiga ko`ra, davo muolajalarini olishlari lozim. Bu bilan nafaqat ular o`zlariga, balki “Tez yordam” xizmatining samarali ishlashiga ham katta yordam beradi.
