Ombudsmanga Buxoro viloyati Qorako`l tumanida yashovchi fuqaro N.N. tomonidan yoshlar bandligini ta`minlash maqsadida ajratilgan er maydoniga ekilgan g`alla hosili va undan chiqadigan somon berilmaganligi hamda takroriy ekin uchun er maydoni ajratilmaganligi haqida murojaat kelib tushadi.
Murojaat o`rganilishi natijasida haqiqatdan ham ushbu fuqaroga O`zbekiston Respublikasi Vazirlar Mahkamasining 2021 yil 2 fevraldagi tegishli yig`ilish bayoniga binoan, qishloq xo`jaligida yoshlar bandligini ta`minlash, ularni moliyaviy qo`llab- quvvatlash, qishloq joylarda yangi ish o`rinlarini yaratish maqsadida murojaatchiga ikkilamchi ijara shartnomasi asosida Qorako`l tumanidagi “Navro`z Botir” fermer xo`jaligining g`alla ekilgan maydonidan o`n sotix er maydoni ajratilgan.
Mazkur er maydonidagi g`alla parvarishi bilan bog`liq barcha agrotexnika tadbirlari “Navro`z Botir” fermer xo`jaligi tomonidan amalga oshirilganligi sababli, etishtirilgan g`alla hosili fermer xo`jaligi tomonidan yig`ishtirib olingan.
Lekin, murojaatchining ulushi ajratib berilmagan. Fuqaro N.N o`z arizasida “...hosilni ololmagach, erga takroriy ekin ekmoqchi bo`lganimda, menga tegishli maydonga “Navro`z Botir” fermer xo`jaligi tomonidan allaqachon ekinlar ekilgani bois, menga boshqa er ajratilishi aytilgandi. Lekin, avgust oyiga qadar er ajratilgani yo`q” deb yozgan.
Murojaat Ombudsman nazoratiga olingach, Vakilning prokuratura organlariga qilgan murojaatiga asosan, fuqaro H.N.ga o`n sotix er maydonidagi g`alla hosilidagi ulushi undirib berilgan.
Shuningdek, murojaatchiga avvalgi ajratib berilgan er maydoni takroriy ekinlar ekilgan holda qaytarilgan.
