Dzyudo bo`yicha O`zbekiston terma jamoasi a`zosi, Rio-2016 Olimpiya o`yinlari sovrindori, Osiyo o`yinlari g`olibi, Osiyo chempionati kumush medali hamda ko`plab turnirlarda ishonchli g`alabalarga erishgan sportchi Diyorbek Urozboevdan olingan doping-sinamada taqiqlangan modda aniqlangan.
Diyorbek Urozboev O`zbekiston Milliy antidoping agentligining “Milliy test ro`yxati”ga kiritilgan bo`lib, rejali tarzda doping-nazoratidan o`tishi belgilangan. Joriy yilning 6 may kuni sportchidan musobaqadan tashqari davrda doping-sinama olingan edi.
Tekshiruv natijasida sportchi tomonidan Butunjahon antidoping kodeksi va O`zbekiston Milliy antidoping qoidalarining 2.1-moddasida ko`rsatilgan antidoping qoidabuzarligi sodir etilgan ya`ni “Meldonium” taqiqlangan moddasi iste`mol qilinganligi aniqlangan.
“Meldonium” taqiqlangan moddalar ro`yxatining S4. Gormonlar va metabolizm modulyatorlari sinfiga mansub hisoblanadi.
Natijada Urozboev 3 yil muddatga diskvalifikasiya qilindi. Diskvalifikasiya 2021 yil 16 avgustdan 2024 yil 15 avgustga qadar etib belgilandi.
Dzyudochi diskvalifikasiya muddati tugaganga qadar Butunjahon antidoping kodeksi va O`zbekiston Milliy antidoping qoidalarining 2.1-moddasida belgilab qo`yilganidek, xalqaro va milliy toifadagi musobaqalarda ishtirok etishi taqiqlanadi.
Izzatbek Abduvahobov tayyorladi
