"Yangi O`zbekiston” universitetida ilk o`quv yili boshlandi.
Imtihon natijalariga ko`ra, 200 nafar talaba o`qishga qabul qilindi, deya "Darakchi"ga ma`lum qildi Prezident ta`lim muassasalari agentligi .
Qayd etilishicha, universitetda ilk o`quv yilining boshlanishi munosabati bilan 18-23 oktyabr kunlari tanishtiruv haftaligi o`tkazilishi rejalashtirilgan. Mazkur hafta davomida talabalarga oliygohda yaratilgan shart-sharoitlar, fan o`qituvchilari, dars jadvallari, baholash me`zoni, universitet tartib-qoidasi, shuningdek “Yangi O`zbekiston” ta`lim portali (Intranet) bilan tanishtiriladi.
Ma`lumot o`rnida, “Yangi O`zbekiston” universitetiga kirish imtihoni Cambridge Assessment tashkiloti bilan hamkorlikda joriy yilning 6 sentyabr kuni bo`lib o`tib, unda saralash bosqichidan muvafaqqiyatli o`tgan 1213 nafar nomzod ishtirok etishgan.
Imtihonlarning 1-bosqichi – saralash jarayonlarida jami 6000 dan ortiq talabgorlar ro`yxatdan o`tgan.
2021-2022 o`quv yilida mazkur universititetga quyidagi yo`nalishlarga qabul bo`lib o`tgan:
- Mexanika muhandisligi;
- Kimyo muhandisligi;
- Dasturiy ta`minot muhandisligi.
Ma`lumotga ko`ra, “Yangi O`zbekiston” universiteti o`z yo`nalishida “Dunyoning eng yaxshi 100 universitetlari” reytingida 1-o`rinda turadigan Massachusets texnologiya instituti bilan hamkorlik qiladi. Universitetga mahalliy mutaxassislar bilan bir qatorda xorijiy pedagog-kadrlar ham jalb etilgan.
