Bugun Birlashgan Arab Amirliklarining Dubay shahrida Osiyo Olimpiya kengashining (OOK) Bosh assambleyasi bo`lib o`tadi. Mazkur tadbirdan avval tashkilot Ijroiya qo`mitasining yig`ilishi bo`lib o`tdi. Bu haqda O`zbekiston Milliy olimpiya qo`mitasi ma`lum qildi.
Unda Ijroiya qo`mita a`zosi sifatida Osiyo Olimpiya kengashi vise-prezidenti Otabek Umarov, shuningdek, O`zbekiston Milliy Olimpiya qo`mitasi Bosh kotibi Oybek Kasimov, MOQ raisi o`rinbosari Azizjon Kamilov ishtirok etdi. Yig`ilish kun tartibida qit`amiz sportida kutilayotgan yirik kompleks musobaqalarga tayyorgarlik ko`rish bo`yicha fikrlar almashilgan.
Tadbirda Osiyo Olimpiya kengashining boshqa rahbariyat vakillari qatorida Milliy Olimpiya qo`mitalari assosiasiyasining amaldagi rahbari Robert Mitchel va Bosh kotibi Gunilla Lindberg ham qatnashgan.
Bugun OOKning 40-Bosh Assambleyasi bo`lib o`tadi. Unda tashkilot vise-prezidentlari, jumladan, Otabek Umarov Olimpizm targ`iboti, uni yangi bosqichga olib chiqish, belgilangan kompleks musobaqalarga tayyorgarlik haqida taqdimot namoyish etishadi. Oybek Kasimov tadbir ishtirokchilarini mamlakatimizda «Toshkent-2025» IV yoshlar Osiyo o`yinlariga tayyorgarlik bo`yicha olib borilayotgan ishlar bilan tanishtiradi.
Tadbirning kelgusi mezboni aniqlangach Bosh Assambleya o`z ishini yakunlaydi.
