Oliy Majlis Qonunchilik palatasida Hisob palatasining 2021 yil hisoboti eshitildi. Bu haqda deputat Rasul Kusherbaev xabar bermoqda.
Unga ko`ra,
- 2021 yil davomida davlat haridlari jarayonida 763 ta holatda 971,1 mlrd so`mlik manfaatlar to`qnashuviga yo`l qo`yilgan.
- Barcha manbalar hisobidan 5 trln so`mlik 783 ta muammoli ob`ektlar belgilangan muddatlarda foydalanishga topshirilmagan.
- Xususan, 144 ta maktabgacha ta`lim, 117 ta maktab, 57 ta sport, 214 ta kommunal xo`jaligi, 69 ta avtomobil yo`llari va 145 ta boshqa ijtimoiy ob`ektlar foydalanishga topshirilmagan.
- Osiyo taraqqiyot banki ishtirokida loyihaning umumiy qiymati 121 mln. AQSh dollari bo`lgan Toshkent viloyatida ichimlik va oqova suv tizimlarini qurish loyihasining qiymati 30 mlrd so`mga oshirilgan.
- Bunda bir donasi 175 ming so`m bo`lgan suv hisoblagichning 10 938 donasi 1 842,2 ming so`mdan, 20 033 donasi 694,1 ming so`mdan loyihaga kiritilib 28,6 mlrd so`m mablag`lar ortiqcha rejalashtirilgan.
- Qurilish sohasida 3,5 trln so`mlik tender savdolarida qonunbuzilish holatlari aniqlangan.
- Ipoteka uchun byudjetdan ajratilgan 1,1 trln so`m subsidiyalardan 7959 ta uy-joylar uchun bor yo`g`i 240,5 mlrd so`mi foydalanilgan.
- Jizzax viloyatida irrigasiya va meliorasiya ob`ektlarini qurish, rekonstruksiya qilish va ta`mirlash-tiklash bo`yicha loyihalarda 52,4 mlrd so`mlik shartnomalarni tuzish va tender savdolarni o`tkazishda manfaatlar to`qnashuviga yo`l qo`yilgan.
- Haqiqatda mol-mulki mavjud bo`lgan 1620 ta qarzdorning 85,4 mlrd so`mlik ijro hujjatlari Majburiy ijro byurosining hududiy bo`limlari tomonidan mol-mulki mavjud emas, deb qaytarilgan.
- 10,9 mlrd so`mlik byudjet mablag`lari Andijon shahar xalq ta`limi bo`limining markazlashgan hisobxona hisobchilari tomonidan noqonuniy o`zlashtirilgan.
- Tuman tibbiyot birlashmalarida ish haqi uchun ajratilgan mablag`larni maqsadli sarflanishi bo`yicha tekshirishlarda 9 ta tuman va shaharda 16,7 mlrd so`m byudjet mablag`lari noqonuniy o`zlashtirilgani aniqlangan.
- Masalan, Urgut tumanida 2,3 mlrd so`m, Andijon tumanida 1,8 mlrd so`m, Ulug`norda 1,7 mlrd so`m, Boyovutda 1,2 mlrd so`m ish haqi uchun mablag`lar soxta to`lov vedomostlarini rasmiylashtirish orqali noqonuniy o`zlashtirilgan.
- Sog`liqni saqlash vazirligining "Tibbiyot qurilish injiniring" korxonasi nazoratida bo`lgan qurilish ta`mirlash ishlarida qo`shib yozish, qurilish materiallariga qimmat narxlarni qo`llash orqali 11 mlrd so`m byudjet mablag`lari ortiqcha sarflangan.
- Toshkent tibbiyot akademiyasi binosida dastlabki bajarilgan tugallanmagan qurilishlar loyihani qayta ishlab chiqilishi natijasida asossiz buzilib, 22,4 mlrd so`m mablag` samarasiz sarflangan.
- "Yoshlar-kelajagimiz" jamg`armasi hisobidan 2018-2020 yillarda 1 491,0 mlrd so`mlik harajatlar amalga oshirilib, bunda 5,7 mlrd so`mlik asossiz harajatlarga yo`l qo`yilgan.
