2022 yilning 20, 21, 22 mart kunlari Toshkentdagi "Do`stlik" bog`ida "MAKON FEST – 2022" milliy san`at va an`analar festivali bo`lib o`tadi.
O`zbek xalqining an`ana va urf-odatlari, amaliy san`ati, milliy taomlari, betakror og`zaki va nomoddiy merosining butun hilma-xilligini aks ettiruvchi mazkur tadbir Toshkent shahar hokimligi, Yakkasaroy tuman hokimligi, Turizm va madaniy meros vazirligi, Do`stlik bog`i, Makon telekanali hamkorligida o`tkazilmoqda.
Qayd etilishicha, kun davomida tonggi soat 9:00 dan kechki 22:00 gacha Toshkent shahri aholisi va mehmonlari uchun musiqa va raqs jamoalari shoulari, xalq sayillari, mavzuli mahorat darslari shuningdek sharqona yarmarka, dorboz polvonlar chiqishlari, moda namoyishlari, gastronomik yarmarka va “food-show” bo`lib o`tadi.
3 kun ichida festivalga 15 mingga yaqin mehmonlar, jumladan Italiya, AQSh, Xitoy, Rossiya, Fransiya, Shveysariya, Yaponiya, Buyuk Britaniya, Isroil, Ispaniya, Gresiya, Qozog`iston, Ozarbayjon va boshqa davlatlardan sayyohlar tashrif buyurishi kutilayotgani aytilmoqda.
Festivalda dunyoning ko`plab davlatlaridan maxsus tashrif buyurgan 100 dan ortiq xalqaro mehmonlar, jumladan, taniqli madaniyat va san`at namoyandalari, olimlar va tadqiqotchilar, nufuzli xalqaro ommaviy axborot vositalari vakillari ishtirok etadi.
