Davlatimiz rahbari iqtisodiy kompleks rahbarlariga makroiqtisodiy barqarorlikni saqlab qolish bo`yicha ta`sirchan choralarni davom ettirishga ko`rsatma berdi, deb xabar bermoqda Prezident matbuot xizmati.
Buning uchun hudud va tarmoq xarajatlarini 10 trillion so`mga qisqartirish talab etiladi.
Prezident yil yakuniga qadar barcha hokimlik, vazirlik va idoralarga:
- moliyaviy manbasi aniq bo`lmagan qurilishlarni boshlash;
- bino ta`mirlash, avtomobil, mebel, ofis anjomlari xarid qilish kabi qo`shimcha xarajatlarni amalga oshirishni qat`iyan taqiqladi.
Bosh prokuraturaga byudjet tashkilotlarida ushbu xarajatlarning oldini olish ustidan tizimli nazorat o`rnatish va viloyat kesimida har hafta Prezidentga axborot berish topshirildi.
"Bu – mablag`lar olib qo`yiladi, degani emas. Barcha iqtisod qilingan mablag`lar ushbu hudud va tarmoqning rivojlantirish dasturiga yo`naltiriladi", dedi Shavkat Mirziyoev.
Shuningdek, hudud va tarmoqlar rahbarlariga 2022 yil 1 apreldan boshlab davlat dasturlaridan tashqari byudjetdan ssuda berish va banklarga depozit qo`yishni to`xtatishga topshiriq berildi.
Har bir tarmoq va hudud rahbari bugundanoq aniq hisob-kitob qilib, uch kun muddatda o`z rejalarini ishlab chiqishi kerakligi ko`rsatib o`tildi.
Soliq va Bojxona qo`mitalariga tushumlarni ta`minlash yuzasidan tegishli topshiriqlar berildi.
Bundan tashqari, o`tgan haftada 1,5 mingdan ziyod davlat mulkini savdoga chiqarish bo`yicha imzolangan Prezident qarori ijrosini ta`minlash bilan bog`liq vazifalar belgilab berildi.
Masalan, 2022 yil 1 mayga qadar 50 mingta (4,5 ming gektar) er uchastkalarini savdoga chiqarish nazarda tutilgan. Biroq, Samarqandda hozirgi kungacha bor-yo`g`i 6 ta er uchastkasi elektron savdolarga qo`yilgan. Qolgan hududlarda esa bironta er uchastkasi savdoga chiqarilmagan.
Ikki hafta muddatda ushbu erlarni to`liq auksionga chiqarib, 1 iyulga qadar ularning kamida 50 foizi sotilishini ta`minlash vazifasi qo`yildi.
