Kuni kecha Samarqand viloyatining Kattaqo`rg`on tumanidagi Qoradaryo elektr ta`minoti korxonasi rahbari elektr energiyasi iste`molchisi tomonidan pichoqlandi.
"Hududiy elektr tarmoqlari" AJ Matbuot xizmati bu haqda xabar bermoqda.
Ma`lum bo`lishicha, tumanda faoliyat yurituvchi MChJ korxonasi elektr energiyasidan 57 mln. so`mlik muddati o`tgan qarzdorligi uchun tuman elektr ta`minoti korxonasi mas`ullari tomonidan o`chirilgan.
Shundan so`ng, MChJ rahbari Qoradaryo elektr ta`minoti korxonasi rahbari Pirxon Nazarovdan elektr energiyasidan qarzdorligi mavjud bo`lsada, tarmoqqa qayta ulab berishni talab qilgan. Korxona rahbari, o`z navbatida, qarzdorlik to`liq bartaraf etilgach, iste`molchi tarmoqqa qayta ulanishini ma`lum qilgan.
Korxona rahbarining asosli talabini bajarishni istamagan MChJ rahbari kelishmovchilik davomida o`zi bilan yonida olib kirgan pichoq bilan o`qtalib, tuman elektr ta`minoti korxonasi rahbarining bo`yin qismiga jarohat etkazadi.
Ma`lum qilinishicha, hozirda tuman elektr ta`minoti korxonasi rahbari shifoxonaga joylashtirilgan va shifokorlar nazoratida.
Ayblanuvchiga nisbatan esa O`zbekiston Respublikasi Jinoyat kodeksining tegishli bandlari asosida ish qo`zg`atilgan hamda prosessual tartibda ushlanib, qamoqqa olingani aytilmoqda.
