Toshkentda mehribonlik uyida bolalar norozilik namoyishi uyushtirilganligi haqida xabar berilgan edi.
Bosh prokuratura Matbuot kotibining darakchi.uzga xabar berishicha, Yunusobod tumani prokurori rahbarligida tuzilgan ishchi guruhi tomonidan 21-son Mehribonlik uyining faoliyati tekshirilgan.
Tekshirish davomida muassasada nosog`lom va qoniqarsiz muhit tufayli ayrim tarbiyalanuvchilarda norozilik kayfiyati paydo bo`lganligi va namoyish uyushtirilganligi aniqlandi.
Shu sababli, 26 aprel kuni 21-sonli Mehribonlik uyi direktori bilan tuzilgan mehnat shartnomasi bekor qilindi.
Bundan tashqari, tekshirish davomida muassasa mansabdor va moddiy javobgar shaxslarining noqonuniy hatti-harakatlari oqibatida o`zganing ko`p miqdordagi mablag`lari o`zlashtirish va rastrata qilish yo`li bilan talon-taroj qilinganligi ma`lum bo`ldi.
Mazkur holat yuzasidan 16 may kuni Jinoyat kodeksining 167, 205 va 207-moddalari bilan jinoyat ishi qo`zg`atildi.
