O`zbekistonda koronavirus infeksiyasi tarqalishining dinamikasiga nazar tashlasak, joriy yil 14 iyundan boshlab aholi orasida kasallanish ko`rsatkichlari nisbatan ortayotganini ko`rish mumkin.
Shu bois ayni paytda yurtimizda xastalikni erta aniqlash, o`z vaqtida zarur davo choralarini ko`rish maqsadida COVID-19ga gumon qilingan shaxslardan PZR-test tahlillarini olish ishlari samarali tashkil etilyapti. Bu haqda SSV matbuot xizmati xabar qildi.
Jumladan, Sanitariya-epidemiologik osoyishtalik va jamoat salomatligi xizmati ma`lumotiga ko`ra, joriy yil 15-25 iyun kunlari mamlakatimizda kuniga o`rtacha 5629 ta, jami 62 mingga yaqin PZR-test sinamasi o`tkazilgan.
So`nggi kunlarda esa bu raqam qariyb ikki barobarga ortib, kuniga o`rtacha 10 ming nafar fuqarodan PZR-test tahlillari olinmoqda.
Qayd etish kerakki, o`tgan yil iyun oyining oxirgi haftasida jami 284 500 ga yaqin ana shunday sinama tahlillari o`tkazilgan edi.
Ma`lumot uchun, kecha O`zbekistonda yana 97 nafar kishida koronavirus infeksiyasi aniqlandi. Mamlakatda jami kasallanganlar soni 240 764 nafarga etdi.