Namangan viloyati, Uychi tumanidagi arxeologik yodgorlikka hokimlik qarori bilan katta zarar etkazilgan. Bu haqda Madaniy meros agentligi xabar bermoqda.
Ma`lum qilinishicha, Namangan viloyati Madaniy meros boshqarmasi tomonidan ushbu holat o`rganilib, to`plangan hujjatlar viloyat prokuraturasiga qonuniy chora ko`rish uchun yuborildi.
Aniqlanishicha, Uychi tumani, "Pastguzar" MFY, Beruniy ko`chasida joylashgan "Uychi manzilgohi (BT-3)" ob`ekti arxeologik yodgorlik bo`lishiga qaramay, tuman hokimining 2019 yil 6 apreldagi 1473-sonli qaroriga asosan fuqaro T. D. ga tadbirkorlik faoliyatini amalga oshirish uchun noqonuniy tarzda berib yuborilgan. Ushbu obekt Vazirlar Mahkamasining 2019 yil 4 oktyabrdagi "Moddiy madaniy merosning ko`chmas mulk obektlari milliy ro`yxatini tasdiqlash to`g`risida"gi 846-son qaroriga asosan madaniy meros ob`ekti sifatida davlat muhofazasiga olinganiga qaramay, unga katta zarar etkazilgan.
Namangan viloyat prokuraturasi va DXX tomonidan olib borilgan o`rganishlar natijasiga ko`ra o`tgan vaqt mobaynida MChJ tomonidan yodgorlik hududining 21 sotix qismida og`ir texnika yordamida surish va qazish ishlari olib borilgan. Oqibatda arxeologiya obektiga 3,9 milliard so`m miqdoridagi zarar etkazilgan.
Mazkur holat yuzasidan Namangan viloyati Madaniy meros boshqarmasi to`plagan hujjatlar asosida Namangan viloyati prokuraturasi tomonidan Uychi tuman hokimligi mansabdor shaxslari hamda MChJ rahbariga nisbatan jinoyat ishi qo`zg`atilgan. Hozirda tergov va surishtiruv ishlari olib borilmoqda.
