Bu haqda AOKAda o`tkazilgan brifingda Bosh prokuratura bo`lim katta prokurori Farrux Sultonov ma`lum qildi.
Bosh prokuror o`rinbosari rahbarligidagi Respublika shtabi hamda viloyat va tuman - shahar prokurorlari rahbarligidagi hududiy shtablar tomonidan o`tgan olti oy davomida ijtimoiy va ishlab chiqarish infratuzilmasini rivojlantirish dasturi doirasida amalga oshirilgan ishlar
Shtablar tomonidan Investisiya dasturidagi 2.413 ta, “Yangi O`zbekiston” massivlaridagi 676 ta va “Obod qishloq” hamda “Obod mahalla” dasturlaridagi 11.427 ta loyihaning har biri monitoringga olingan.
Hozirga qadar Investisiya dasturidagi joriy yilda yangidan boshlanuvchi 1.417 ta ob`ektning loyiha - smeta hujjatlari ishlab chiqildi va ularning 1.407 tasi ekspertizadan o`tkazildi;
– “Obod qishloq” va “Obod mahalla” dasturlaridagi 5.947 ta ob`ektning loyiha - smeta hujjatlari ishlab chiqilib, ularning 5.564 tasi ekspertizadan o`tkazildi;
– “Yangi O`zbekiston” massivlaridagi 499 ta ob`ektning loyiha - smeta hujjatlari ishlab chiqilib, ularning 437 tasi ekspertizadan o`tkazildi;
– dasturlardagi ob`ektlar uchun ajratilgan mablag`ning 5 trln. so`mdan ortig`i yoki qariyib 24 foizi moliyalashtirilib, pudrat tashkilotlari tomonidan 4,5 trln. so`mlik ishlar bajarildi;
– Investisiya dasturidagi 50 ta, “Obod qishloq” va “Obod mahalla” dasturidagi 125 ta ob`ektlarda ishlar sifatli yakunlanib, foydalanishga topshirildi;
– dastur ijrosi bo`yicha mutasaddilar faoliyatini samarali muvofiqlashtirib borish maqsadida Respublika shtabi tomonidan Toshkent, Sirdaryo, Buxoro, Navoiy, Samarqand, Andijon, Farg`ona, Namangan, Qashqadaryo, Surxondaryo viloyatlari hamda Toshkent shahrida o`rganishlar o`tkazildi.
Ushbu o`rganishlarda aniqlangan muammolarni hal etish, jumladan, ob`ektlarda sifatli mahalliy qurilish materiallarini ishlatish, loyihalarni aptimallashtirish hamda yangi texnologiyalardan foydalanish choralari ko`rildi.
Dasturlar ijrosida kamchilikka yo`l qo`ygan va o`z vazifasini lozim darajada bajarmagan 252 nafar mas`ullar intizomiy va 359 nafari ma`muriy javobgarlikka tortildi. Qurilish sohasida qo`pol qonun buzilishi holatlari yuzasidan 61 ta jinoyat ishlari qo`zg`atildi. 880 nafar fuqaro va tadbirkorlarning buzilgan huquqlari tiklab berildi.
Shtablar tomonidan o`tkazilayotgan nazorat tadbirlari davomida amaldagi qonunchilik hujjatlarini takomillashtirish masalalari ham o`rganib chiqilmoqda.
Xususan, Respublika shtabi tomonidan qurilish - pudrat, loyiha - qidiruv tashkilotlari reytingini yuritish va elektron tender savdolarini o`tkazish tartibidagi ayrim holatlar ko`rib chiqildi.
Mazkur masalalarni ko`rib chiqish jarayonida loyiha va pudrat tashkilotlari ham bevosita jalb etilib, ularning fikr va takliflari olindi.
Muhokamalar natijasiga ko`ra amaldagi qurilish - pudrat va loyiha - qidiruv tashkilotlari reytingini hamda elektron tender savdolari o`tkazishni takomillashtirish yuzasidan takliflar ishlab chiqilib, Hukumatga kiritildi.
Ushbu takliflar reyting yuritish va elektron tender o`tkazishda halol raqobat hamda adolat tamoyillariga qat`iyrioya etish, ushbu jarayonlarda inson omilini keskin qisqartirish va pudrat tashkilotlarining haqiqiy salohiyatini aniqlashga xizmat qiladigan tizim yaratishga qaratilgan.
Hozirda takliflar belgilangan tartibda ko`rib chiqilmoqda.
Bundan tashqari, Respublika shtabi tomonidan davlat dasturlariga kiritilgan ob`ektlardagi qurilish – ta`mirlash ishlarini sifati ustidan ta`sirchan jamoatchilik nazoratini kuchaytirishga alohida e`tibor berilmoqda.
Shu maqsadlar uchun “Telegram” ijtimoiy tarmog`ida “QURILISHDA NAZORAT” deb nomlangan maxsus telegram bot ishga tushirilgan hamda ishonch telefoni tashkil etilgan. Mazkur bot orqali fuqarolarimiz tomonidan o`z yashash hududidagi davlat dasturiga kiritilgan ob`ektlar bo`yicha amalga oshirilayotgan qurilish ishlari haqida prokuratura organlaridan tashkil etilgan shtablarga foto lavhalar bilan birgalikda to`g`ridan-to`g`ri xabar yuborishlari hamda ishonch telefoni orqali murojaatlarini qoldirishlari mumkin.
Bildiriladigan har bir xabar Respublika shtabi tomonidan nazoratga olinib, qisqa muddatlarda ko`rib chiqilishi ta`minlanadi.
