Kecha Madaniyat vazirligida ijodkorlarning mualliflik huquqini ta`minlash masalalariga qaratilgan matbuot anjumanida O`zbekiston xalq artisti Yodgor Sa`diev ham so`zga chiqib, bu borada uning o`zi ham jabrdiydalardan biri ekanligi haqida gapirdi.
"Mualliflik huquqi himoya qilinadigan kunlarni juda ko`p kutganman. Juda yaxshi bo`ldi. Bundan jabr-u jafo chekkanlardan bittasi ham menman. Ya`ni "Shaytanat" filmi orqali - hali televizorga chiqmagan narsani gazetalarga chiqarishib, to`s-topolon qilib yuborishgan. Huddi damlab qo`yilgan oshni o`g`irlab ketishganidek - bu o`g`irlikka kiradi. Bunga hammamiz qo`shilishib, yordam ham beramiz. Chunki kerakli narsa", - dedi u.
Shu o`rinda Yodgor Sa`diev teatrlardagi p`esa yozuvchilariga birinchi marta mablag`lar ajratilayotgani uchun ham minnatdorchilik bildirarkan, yana bir taklifni ilgari surdi. Unga ko`ra, bir paytlar amalda bo`lgan televidenie ko`rsatuvlarida chiqqanlarga gonorar to`lash tizimini yana qaytarish kerak.
"Mana shu ham mualliflik huquqi aslida. Hozirda esa televidenielarga chiqish uchun pul to`lashyapti", - dedi aktyor.
Bunga javoban Madaniyat vaziri Ozodbek Nazarbekov yangi tashkil qilingan Palataga katta mas`uliyat va vazifalar yuklanayotgani, bu vazifalar Yodgor Sa`diev keltirgan takliflarni, shuningdek, undan tashqari ham juda ko`plab punktlarni o`zida qamrab olayotganini ma`lum qildi.
