Toshkentda “Xalq yuragi” turkumidagi hujjatli filmlar tanlovi yakunlandi.
9 sentyabr kuni Adiblar xiyobonida “Xalq yuragi” turkumidagi hujjatli filmlar ijodkorlarini tantanali taqdirlash marosimi bo`lib o`tdi, deya xabar bermoqda Kinemotografiya agentligi.
Ma`lum qilinishicha, 2020 yil 20 may kuni O`zbekiston Respublikasi Prezidenti Shavkat Mirziyoev tomonidan Adiblar xiyobonining ochilish marosimida Kinematografiya agentligiga majmuada haykallari o`rnatilgan atoqli yozuvchi va shoirlar haqida hujjatli filmlar yaratish vazifasi yuklatilgan edi.
"Bu yo`nalishda olib borilgan dastlabki ijod namunasi sifatida 2020 yilda o`zbek shoir va yozuvchilarga bag`ishlangan “Xalq yuragi” hujjatli filmi yaratildi. Kinematografiya agentligi tomonidan har bir yodgorlikka biriktirilgan oliy o`quv yurtlari bilan hamkorlikda 24 ta “Xalq yuragi” nomli turkum hujjatli filmlar yaratildi. Mazkur kartinalar orasidan hakamlar hay`ati rejissyor Xusan Rashidovning “Cho`lpon. Qush esdaligi” kinolentasi eng munosib deb topdi",-deyiladi xabarda.
Bugun “Xalq yuragi” loyihasida filmlarni suratga olgan rejissyorlar tantanali ravishda qimmatbaho sovg`alar bilan taqdirlandi. Taniqli kinoijodkorlar, yozuvchilar, san`at va madaniyat arboblaridan iborat nufuzli hakamlar hay`ati tomonidan aniqlangan g`olib bosh sovrin – Chevrolet Cobalt avtomobili sohibiga aylandi.
“Cho`lpon. Qush esdaligi” filmi orqali men mana shu mukofotga sazovor bo`ldim. Albatta, muvaffaqiyatga umid qilgan edik, chunki salkam 300 kishilik jamoa bilan film ustida astoydil ish olib bordik. Yosh kinoijodkorlarga, xususan, hujjatli film ijodkorlariga berilayotgan imkoniyatlar, bunday ulkan rag`batlar uchun muhtaram Prezidentimizdan behad minnatdorman. Men umumiy g`alabamizda ishtirok etgan barchaga - jamoamga, ota-onamga, ustozlarimga rahmat aytmoqchi edim. O`zbek kinosi tarixida bunday motivasiya va rag`batlantirish birinchi marta deb hisoblayman”, — deydi tanlov g`olibi, film postanovkachi rejissyori Xusan Rashidov.
Tadbirda so`zga chiqqan Kinematografiya agentligi Bosh direktori mazkur sovrin ijodkorlar uchun motivasiya bo`lishini aytadi.
“O`zbekistonda hujjatli film yo`nalishi yuksalib bormoqda. O`zbekiston Respublikasi Prezidenti Shavkat Mirziyoev va mamlakat hukumati tomonidan mazkur sohaning qo`llab-quvvatlanayotganidan behad mamnunmiz. O`zbekiston kinematografiyasi tarixida ilk bor hujjatli film ijodkorlari orasida yirik tanlov o`tkazildi. Biz pandemiya davrida 24 ta film yaratish ustida fidokorona mehnat qilgan hujjatli kino ijodkorlarni munosib rag`batlantirishga harakat qildik. Bosh sovrin – Chevrolet Cobalt avtomobili yosh kinoijodkorlar uchun kuchli motivasiya bo`la oladi”, — degan Firdavs Abduholiqov.
Eslatib o`tamiz, poytaxtdagi oliy o`quv yurtlari rahbarlariga “Xalq yuragi” turkumidagi barcha filmlar aks etgan flesh-disklar va albomlar topshirilgan bo`lsa, rejissyorlar zamonaviy planshetlar bilan taqdirlanishgan.