Toshkent shahri Chilonzor va Shayxontohur tumanlari kesishmasi, Baynalminal ko`chasi chorrahasi yo`lning qatnov qismida 16 sentyabr kuni taxminan 3-4 nafar voyaga etmagan bolalarning tilanchilik qilib yurgani tasvirlangan video tarqaldi. Oliy Majlisning Inson huquqlari bo`yicha vakili bolalar ombudsmani holat yuzasidan munosabat bildirdi.
Qayd etilishicha, bola huquqlari bo`yicha vakil mazkur videoni ko`rishi bilanoq tegishli chora ko`rilishi uchun uni Ichki ishlar vazirligining mas`ul xodimiga murojaat qilgan. Holat yuzasidan zudlik bilan Chilonzor tumani Ichki ishlar organlari faoliyatini muvofiqlashtirish boshqarmasi va Toshkent shahar Ichki ishlar bosh boshqarmasi huquqbuzarliklar profilaktikasi boshqarmasi voyaga etmaganlarga ijtimoiy-huquqiy yordam ko`rsatish markazining mas`ul xodimlari ishtirokida tezkor guruh tuzilib, voqea joyiga yuborilgan.
Shuningdek, olib borilgan tezkor surishtiruv ishlari davomida 5 nafar voyaga etmagan va 4 nafar voyaga etgan bola tuman Ichki ishlar organi faoliyatini muvofiqlashtirish boshqarmasiga olib kelinib, shaxsiga aniqlik kiritilgan.
Aniqlanishicha, ularning barchasi Qashqadaryo viloyatida ro`yxatda turishi ma`lum bo`lgan. Holat yuzasidan to`plangan hujjatlar asosida Bola huquqlari milliy komissiya Qashqadaryo viloyati boshqarmasi va hududiy ichki ishlar bo`limiga taqdimnoma kiritilgan.
