Markaziy va Sharqiy Evropadagi to`qqiz NATO davlati prezidentlari qo`shma bayonot berib, Rossiyaning Ukraina hududlarini anneksiya qilganini qoraladi va alyansni Ukrainaga harbiy yordamni sezilarli darajada oshirishga chaqirdi. Bu haqda "Zamon.uz" yozmoqda.
"Biz Ukraina suvereniteti va hududiy yaxlitligini qo`llab-quvvatlashimizni yana bir bor tasdiqlaymiz, Rossiyaning Ukraina hududini anneksiya qilishga urinishlarini hech qachon tan olmaymiz", deyiladi bayonotda.
Shuningdek, Markaziy va Sharqiy Evropa davlatlari prezidentlari Ukrainaning NATOga a`zo bo`lishi haqidagi qarorni qat`iy qo`llab-quvvatlashlarini bildirdilar.
Xususan, bayonotda Markaziy va Sharqiy Evropa davlatlari prezidentlari Ukrainani Rossiya bosqinidan himoya qilishda qo`llab-quvvatlashini, Rossiyadan barcha bosib olingan hududlardan qo`shinlarni zudlik bilan olib chiqib ketishni talab qilishini bildirgan.
Eslatib o`tamiz, juma kuni Vladimir Zelenskiy Ukraina Shimoliy Atlantika ittifoqiga tezlashtirilgan kirish uchun ariza imzolaganini e`lon qilgan edi.