Ijtimoiy tarmoqlarda "IT-Park Rewind—2022" yillik anjumaniga sarflangan pullar miqdori haqidagi ma`lumot tarqaldi. Muhokamalarda bu mablag`lar bolalarni o`qitishga sarflansa, samaraliroq bo`lishi aytildi.
Axborot texnologiyalari va kommunikasiyalarini rivojlantirish vaziri Sherzod Shermatov muhokamalarga sabab bo`lgan "IT-Park Rewind—2022" anjumaniga sarflangan 819 million so`m bo`yicha munosabat bildirdi.
"AyTi sohasida ish bilan band bo`lganlarning umumiy soni (rezidentlarda ishlaydiganlar va rasman frilanser bo`lib ro`yxatdan o`tganlar) an`anaviy aloqa sohasidagilarnikidan oshdi. Bu albatta IT Park komandasining to`g`ri ishlagani sabablidir. Shu vaqtgacha bu komandaga umuman yordam bermagan odamlar yo`q joydan hozir ularni qoralashga harakat qilayotgani esa achinarli xol…", – deya kinoya qiladi vazir.
Ta`kidlanishicha, 24 iyul kuni o`tkazilgan "IT Park Rewind" tadbirida Birlashgan Arab Amirligi, Germaniya, Hindiston, Rossiya, Belarus davlatlaridan mehmonlar kelib, O`zbekistonni IT xabga aylantirish va eksportni yanada oshirish bo`yicha vazifalarni muhokama qilishgan.
Qayd etilishicha, tadbirdan so`ng hozirgi kungacha "IT Park" rezidentlari soni 174 taga oshgan. Shundan 56tasi eksporter.
"Bu esa yana qo`shimcha 2000dan ortiq ishchi o`rinlari degani. Kichkina emas, balki 400dan ortiq mehmonlar (soha xodimlari va ASTRUM o`quvchilari bilan hisoblasa 1000ga yaqin) qatnashgan tadbir 819 mln so`mga tushgan ekan, nechta bolani bu pulga o`qitsa bo`ladi deyishibdi. INXA yoki AMITIda 1 yil o`qish 30 mln atrofida bo`lsa, 4 yilda bir bolaga 120 mln ketadi, ya`ni bu pulga 7 ta bolani bakalavrga o`qitsa bo`ladi. Uniyam qilish kerak albatta (shuning uchun INXAga Prezidentimiz 100 ta grant ajratib berdilar), lekin bu tadbir ham muhim.
Xullas, yoki IT Park faoliyatiga endi katta-katta kompaniyalar ishonib, O`zbekistonga autsorsni ko`paytirib turgan vaqtda unga xalaqit qilmasdan kelgusi katta marra eksportni 1 mlrd dollarga olib chiqish ustida birgalikda ishlashimiz kerak yoki mayda g`iybat gaplar bilan ularni ham qo`lini sovutib, O`zbekistonni AyTi autsorsing xabiga aylantirish fikridan voz kechishimiz kerak", – deydi Sh.Shermatov.
