Avvalroq, Prezident qarori bilan 2023 yildan boshlab har yili yoshlarning axborot-kommunikasiya texnologiyalari sohasidagi startap loyihalarini yanada qo`llab-quvvatlash maqsadida umumiy mukofot jamg`armasi 1 million dollar bo`lgan Prezident sovrini uchun tanlov o`tkazilishi haqida xxabar berilgan edi.
Hujjatga ko`ra, tanlovda 18 yoshdan 30 yoshgacha bo`lgan O`zbekiston Respublikasi fuqarolaridan iborat jamoa ishtirok etishi mumkin.
Tanlov 2023 yilda quyidagi 5 ta yo`nalish bo`yicha o`tkaziladi:
- Sun`iy intellekt texnologiyalari — Sun`iy intellekt texnologiyalariga asoslangan turli sohalar uchun echimlar;
- Ijtimoiy yo`nalishda raqamli texnologiyalar — ta`lim, sog`liqni saqlash, turizm, transport va logistika sohalarida operasion jarayonlarini raqamlashtirish, davlat xizmatlarini elektron tarzga o`tkazish yoki ijtimoiy sohalarda mavjud muammolarni hal etishga qaratilgan loyihalar;
- Axborot va kiberxavfsizlik texnologiyalari — turli sohalarda dasturiy mahsulotlar va apparat-dasturiy majmualarning xavfsizligini ta`minlash, kiberjinoyatlarning oldini olishga qaratilgan loyihalar;
-Tadbirkorlik va moliyaviy texnologiyalar — tadbirkorlik sub`ektlari va xo`jalik boshqaruv organlari uchun elektron tijorat, korporativ echimlar va moliya texnologiyalarini yaratishga qaratilgan loyihalar;
- Kompyuter va mobil o`yin dasturlari — kompyuter va mobil qurilmalar uchun offlayn yoki onlayn o`yinlar ishlab chiqish hamda jarayonlarni geymifikasiya etishga qaratilgan loyihalar.
Tanlov g`oliblari va sovrindorlari tanlovning yakuniy bosqichida ishtirok etadigan 25 ta jamoa orasidan jamoatchilik tomonidan maxsus portalda ovoz berish orqali aniqlanadi.
Bunda, jamoatchilik tomonidan ovoz berish natijasiga muvofiq:
Har bir yo`nalish bo`yicha eng ko`p ovozga ega bo`lgan 1, 2 va 3-o`rinlarni egallagan (jami 15 ta) jamoalar tanlov g`oliblari, qolgan 10 ta jamoa tanlov sovrindorlari deb hisoblanadi.
Tanlov g`oliblari:
1-o`rin uchun — 100 000 AQSh dollari;
2-o`rin uchun — 50 000 AQSh dollari;
3-o`rin uchun — 30 000 AQSh dollari.
Tanlov sovrindorlarining har biri — 10 000 AQSh dollari miqdorida bir martalik pul mukofotlari bilan taqdirlanadi.
Tanlovga 2023 yil mart oyida start berilishi rejalashtirilgan.
