Sog`liqni saqlash vazirligining rasmiy telegram kanalida yangi gripp haqida ma`lumot berildi.
Qayd etilishicha, dunyoning ko`plab hududlarida mavsumiy gripp xastaligi keng tarqalayotgan bir pallada olimlar yangi gibrid viruslar paydo bo`lganidan xavotirda.
Eng yomoni, ushbu yangi mutasiyalar inson immunitetiga oson "chap bera oladi". Ya`ni organizmda gripp infeksiyasiga qarshi antitanalar shakllangan bo`lsa-da, ularni qiyinchiliksiz chetlab o`tib, sog`lom hujayralarni zararlaydi.
Mutaxassislarning izoh berishicha, ikki virusning birlashishi fanda koinfeksiyalar deb ataladi. Biroq Shotlandiyaning Glazgo universiteti olimlari tomonidan inson o`pkasida o`tkazilgan tajribalar davomida viruslar bir-biri bilan raqobatlashmasligi, aksincha kuchlarini birlashtirib, yanada xavfli tus olishi aniqlandi.
Biz so`z yuritayotgan gibrid gripp infeksiyalari shu tariqa shakllangan va olimlar hali bunday virusga duch kelishmaganini ta`kidlamoqda.
Xavotirli jihati, ushbu chatishgan xastalik aksariyat hollarda pnevmoniyani keltirib chiqarishi mumkin. Ya`ni infeksiya oqibatida o`pka to`qimalari yallig`lanib, uning bo`shlig`i suyuqlik bilan to`lishi kuzatiladi. Oqibatda bemorning nafas olishi og`irlashib, hayoti xavf ostida qoladi.