Elektron to`lov tashkilotlarining Davlat soliq qo`mitasi bilan integrasiyasi tufayli ularning xizmatlarida uzilishlar kuzatilishi mumkinligi haqida xabarlar tarqalgan edi.
Davlat soliq qo`mitasi ushbu xabarlarga aniqlik kiritgan holda qo`yidagilarni ma`lum qildi.
Ta`kidlanishicha, Prezident qarori bilan o`lov tizimlari operatorlari o`z to`lov tizimlarini onlayn-NKMiga majburiy ravishda ulash va shu orqali soliq organlarining axborot tizimlariga 2022 yil mart oyidan integrasiyalashni ta`minlash talabi o`rnatilgan.
"Ushbu maqsadda to`lov tashkilotlari bilan tizimli ishlar amalga oshirilib, joriy yilning mart oyidan shu kunga qadar 12 marotaba uchrashuvlar tashkillashtirilgan.
Aholi bilan pulli hisob-kitoblarni amalga oshirishda elektron to`lov tizimi orqali elektron fiskal chek taqdim qilish tartibi belgilangan.
Xususan, mavjud 48 ta elektron to`lov tashkilotidan 25 tasi fiskal ma`lumotlar operatoriga integrasiyani to`liq yakunlagan.
Aytish joizki, hozirgi kunda xaridlar uchun to`lovlarni aksariyat hollarda P2P (kartadan kartaga o`tkazish) qilish kuzatilmoqda.
Mamlakat iqtisodiyotini uzoq muddatli rivojlantirish borasida keng ko`lamli islohotlar amalga oshirilayotgan sharoitda axborot texnologiyalari vositasida iste`molchilar, tadbirkorlik sub`ektlari va davlat soliq xizmati organlarining uyg`unlashgan faoliyati alohida ahamiyat kasb etadi.
Raqamlashtirish bilan bog`liq amaliy tajriba iqtisodiy faollikni oshirish va qonuniy faoliyatni amalga oshirayotgan tadbirkorlarni himoya qilish ta`minlanganligini ko`rsatdi.
O`tgan yilning mos davriga nisbatan xarid cheklari soni 185%ga xarid summasi esa 176% ga oshdi. Bu raqamlarni yashirin iqtisodiyotni soyadan chiqarish natijalari deb olish mumkin.
Shu o`rinda 1,5 mln nafardan oshiq fuqarolar huquqlari kafolatlanishi ta`minlandi (yarim trln so`m dan ortiq keshbek to`landi)", - deyiladi rasmiy munosabatda.
