Bugun, 20 noyabr kuni Qatar poytaxti Dohada har to`rt yillikning eng yirik futbol bayrami – 2022 yilgi jahon chempionati ochilish marosimi bo`lib o`tdi.
JCh-2022ni Dohadan turib yoritib borayotganlarning ma`lum qilishicha, "Al-Bayt" stadionida o`tgan marosim yuqori tashkilotchilik va tayyorlangan turli sahna ko`rinishlari bilan o`tgan.
Marosimda janubiy koreyalik qo`shiqchi va BTS guruhi a`zosi Chonguk va qatarlik qo`shiqchi Fahad Al-Kubaysi "Dreamers" kompozisiyasi bilan chiqish qilishgan.
Qatar amiri Tamim bin Hamad At-Tani ochilish nutqi bilan chiqish qilib, barchani mundial bilan tabriklagan.
"Qatardan, arab mamlakatidan barchani jahon chempionatidan qutlayman. Biz bu turnirni jahon chempionatlari tarixidagi eng muvaffaqiyatlisi bo`lishi uchun birgalikda mehnat qildik. Buyuk futbol festivalidamiz. Turli irq, millat, e`tiqod va qarashlardan qat`i nazar futbol barchamizni birlashtiradi. Bu erda butun insoniyat manfaati uchun ham bor kuchimizni sarflab, sarmoya kiritdik.
Nihoyat, bugun biz-u, siz kutgan damlarga etib keldik. Bugundan boshlab, Xudo xohlasa, 28 kun davomida butun dunyo biz bilan ajoyib futbol bayramini kuzatib boradi. Barcha ishtirokchi jamoalar, muxlislarni qutlayman", - deydi Qatar amiri o`z nutqida.
Eng e`tiborli jihati, JCh-2022 ochilish marosimida qatarlik qori yigit G`anim Mufah Qur`oni Karim oyatlaridan tilovat qildi.
Shuningdek, Gollivudning mashhur aktyori Morgan Friman JCh ochilishida chiqish qilib, futbol insoniyatni birlashtirishi haqida gapirgan.
Ochilish marosimidan keyin, Qatar - Ekvador uchrashuvi startidan avval "Al-Bayt" stadioniga JCh bosh sovrini maketi ko`rsatildi. Shu tariqa, ushbu o`yin bilan JCh-2022 rasman start oldi.
Biroq Qatar o`z uyida, musobaqaning dastlabki o`yinida mag`lub bo`ldi.
Ochilish bahsida Ekvador mezbonlarga umuman imkoniyat qoldirmadi. "Fenerbahche" hujumchisi Enner Valensiyaning dubli Lotin Amerikasi vakiliga g`alaba keltirdi.
Quyida esa ochilish marosimidan olingan suratlar bilan tanishing.
