Bugun Samarqandda O`zbekiston-Rossiya biznes-forumi bo`lib o`tdi

Jamiyat 01.12.2022, 20:18
Bugun Samarqandda O`zbekiston-Rossiya biznes-forumi bo`lib o`tdi

Joriy yilning 1 dekabr kuni Samarqand shahrida O`zbekiston-Rossiya biznes-forumi bo`lib o`tdi. Unda vazirlik va idoralar, viloyatlar, tarmoq birlashmalari va uyushmalar rahbarlari, shuningdek, O`zbekiston Respublikasi va Rossiya Federasiyasidan 500 dan ortiq etakchi kompaniya va korporasiyalar vakillari ishtirok etdi.

Tadbirda O`zbekiston delegasiyasiga Bosh vazir o`rinbosari – investisiyalar va tashqi savdo vaziri Jamshid Xodjaev, Rossiya delegasiyasiga esa Rossiya Federasiyasi iqtisodiy rivojlanish vaziri Maksim Reshetnikov boshchilik qildi.

Delegasiyalar rahbarlari o`z chiqishlarida mamlakatlarimiz o`rtasidagi ko`p qirrali hamkorlik yuksak darajada ekani, shuningdek, qo`shma sarmoyaviy loyihalar soni izchil ortib borayotgani, uzoq muddatli savdo aloqalari yo`lga qo`yilganini alohida ta`kidladilar.
O`zbekiston va Rossiya o`rtasidagi tovar ayirboshlash o`sishining ijobiy dinamikasi qayd etildi. So`nggi besh yilda mamlakatlar o`rtasidagi tovar ayirboshlash hajmi 170 foizga o`sdi, 2021 yil oxiriga kelib esa yana uchdan bir qismga ko`payib, 7,5 milliard dollardan oshdi. O`zaro tovar ayirboshlash hajmini 10 milliard dollarga etkazishdan ikki tomon ham manfaatdor ekani bildirildi.

Tomonlar keyingi yillarda investisiyaviy hamkorlik va sanoat kooperasiyasi faollashganini yuqori baholadilar. O`zbekistonda Rossiya kapitali ishtirokida tashkil etilgan korxonalar soni so`nggi 5 yilda 3 barobarga ko`payib, 3000 tadan oshdi.

Bugungi kunda O`zbekistonda neft-kimyo, energetika, kon-metallurgiya, sog`liqni saqlash va farmasevtika, engil sanoat, qurilish materiallari ishlab chiqarish, shuningdek, meva-sabzavotlarni qayta ishlash kabi sohalarda Rossiya kompaniyalari bilan umumiy qiymati 20 milliard dollardan ortiq bo`lgan ikki yuzga yaqin qo`shma loyiha amalga oshirilmoqda.

Shu bilan birga, ikki mamlakatning iqtisodiy salohiyati ustuvor yo`nalishlarda, jumladan, avtomobilsozlik, kimyo va to`qimachilik sanoati, qishloq xo`jaligi va farmasevtika, qurilish materiallari ishlab chiqarish va boshqa sohalarda hamkorlikni yanada rivojlantirish uchun zarur shart-sharoitlar yaratib berayotgani haqida so`z bordi.

Sanoat kooperasiyasining yangi loyihalarini va savdo kelishuvlarini ishlab chiqish maqsadida hududlararo kooperasiyani rivojlantirish bo`yicha qo`shma ishlarni davom ettirish zarurligi qayd etildi. 

Yaqin kelajakda 2023 yilga mo`ljallangan hududlarga o`zaro tashriflar jadvali tasdiqlanadi va navbatdagi uchinchi Mintaqalararo forumni o`tkazishning aniq sanasi kelishib olindi.

Biznes-forum ekspertlar muloqoti uchun samarali maydonga aylandi. Bu erda O`zbekiston va Rossiyaning qator tarmoqlarining salohiyati keng ochib berilib, istiqbolli sarmoyaviy loyihalar taqdim etildi. Tadbir dasturi doirasida, shuningdek, sanoat klasterlarini birgalikda rivojlantirish, sanoat kooperasiyasi zanjirlarini shakllantirish, yoqilg`i-energetika tarmog`i, sanoat va transport, eksport hajmini oshirish, agrosanoat majmuasida kichik va o`rta biznes sub`ektlari o`rtasida ishbilarmonlik aloqalarini o`rnatish, IT-texnologiyalarni joriy etish, savdo-iqtisodiy aloqalarni raqamlashtirish, bozorlarni rivojlantirish kabi yirik qo`shma investisiya loyihalarini amalga oshirishdek ustuvor yo`nalishlarga ishtirokchilar e`tiborini qaratgan bir necha panel sessiyalari ham bo`lib o`tdi.

Shuningdek, forum doirasida ikki mamlakat ishbilarmon doiralari vakillari o`rtasida uchrashuvlar tashkil etilib, ularda qo`shma investisiya loyihalarini amalga oshirish va o`zaro manfaatli savdo shartnomalarini tuzish imkoniyatlari muhokama qilindi.
Tadbir doirasida “O`zbekistonda ishlab chiqarilgan” nomi ostida ko`rgazma ham tashkil etilib, unda mamlakatimizning bir qator tarmoqlar va yo`nalishlardagi sanoat salohiyati namoyish etildi. Ekspozisiya rossiyalik biznes vakillarida qiziqish uyg`otib, hamkorlikning istiqbolli yo`nalishlarini muhokama qilish uchun zamin yaratdi.

Umuman olganda, biznes-forum ikki mamlakat ishbilarmon doiralari vakillariga o`z yon daftarlari yangi hamkorlar to`g`risidagi ma`lumotlar bilan boyitish, o`zaro manfaatli yangi loyiha va tashabbuslarning texnik va moliyaviy jihatlarini atroflicha muhokama qilish, uzoq muddatli istiqboldagi mushtarak manfaatlarni belgilash imkonini yaratib, O`zbekiston va Rossiya o`rtasidagi sheriklikning yangi qirralarini ochib berdi.

Sharhlar

Ob-havo: Toshkent
Valyuta kursi
1