Prezidentning 279-sonli qarori 7-bandiga muvofiq uzrli sabablarga ko`ra o`qishni ko`chirish to`g`risidagi arizalarni qabul qilish bo`yicha hududiy Ishchi guruhlar faoliyati yo`lga qo`yildi. Bu haqda Oliy ta`lim vazirligi xabar berdi.
Xabarda aytilishicha, hududiy ishchi guruhlar 2022 yilning 20 dekabridan 2023 yilning 20 yanvar kuniga qadar (o`sha kuni ham) faoliyat ko`rsatadi.
Yuqoridagi qarorga asosan fuqarolar quyidagi uzrli sabablarga ko`ra hududiy ishchi guruhlariga ariza topshirishlari mumkin:
- talaba oila qurishi munosabati bilan turmush o`rtog`i doimiy yashaydigan hududdagi oliy ta`lim muassasasiga o`qishini ko`chirish uchun;
- davlat organlarining xodimlari ish joyi o`zgargan taqdirda uning turmush o`rtog`i yoki voyaga etmagan farzandi o`qishini ko`chirish uchun (tegishli vazirlik (idora) rahbarining tavsiyasi asosida).
Hududiy ishchi guruhlarga quyidagi hujjatlar taqdim etiladi:
- o`qishni ko`chirish bo`yicha ariza (ariza blankasi hududiy ishchi guruhi tomonidan beriladi va talaba tomonidan joyida to`ldiriladi);
- talabaning reyting daftarchasi yoki belgilangan shakldagi akademik ma`lumotnoma yoki transkript nusxalari (bittasi bo`lsa etarli);
- ️pasport nusxasi;
- ️yuqorida qayd etilgan uzrli sabablarni asoslovchi tegishli hujjatlar.
O`qishni qayta tiklash bo`yicha (ko`chirib tiklash bundan mustasno) arizalar talabaning chetlatilganligiga necha yil bo`lganligidan qat`i nazar bevosita o`zi tahsil olgan OTMga taqdim etiladi.
