Joriy yilning 17 dekabr kuni tungi soat 02.30larda «Xavfsiz hayot» mobil ilovasi orqali chaqiruv e`lon qilindi. Shu yaqin atrofda xizmat vazifasini o`tayotgan Xorazm viloyati IIB JXX JTSB PPX bataloni 1-otryad haydovchi xodimi, kichik serjant Razzoq Abdullaev hamda 2-otryad safdor xodimi, safdor Toxir Shamakovlar darhol mobil ilova orqali chaqiruv yuborgan fuqaro bilan bog`lanishdi. U Urganch shahridagi «Mash`al» mahallasi hududidan o`tuvchi «Shovot» kanalida noma`lum kimsa muz yorilib ketishi oqibatida suvga tushib ketgani, zudlik bilan unga yordam berilmasa hayoti xavf ostida ekanligini aytdi.
Tezkor ma`lumotga ega bo`lgan PPX bataloni xodimlari zudlik bilan hodisa joyiga etib borib, kanaldagi fuqaroni suvdan olib chiqishdi va unga tez tibbiy yordam ko`rsatishdi.
Surishtiruvlar davomida fuqaroning shaxsiga aniqlik kiritildi va hodisa sabablari o`rganildi.
-Tanishlarimdan biri to`yga taklif qildi,-deydi Urganch tumanida yashovchi B. Bahodir qilmishidan afsuslangancha.-To`yxonada spirtli ichimlik iste`mol qilganimdan kayfim oshib qoldi. To`y yakunlangach, uyga qaytish niyatida taksi kuta boshladim. Ammo vaqt allamahal bo`lgani uchunmi taksi ham uchramadi. Xullas, yayov uyga qaytishga qaror qildim. Shahardagi «Shovot» kanali ko`prigidan o`tayotib, muz ustida biroz sayr qilgim kelib qoldi. Kanalga tushib, to`rt, besh qadam yurishim bilan muz yorilib suvga tushib ketdim.
Baxtimga kanalning sayozroq joyi ekan. Shunday bo`lsada, bir zumda oyoqlarim loyga botib, harakatlanolmay qoldim. Bir necha bor qirg`oqqa chiqishga urindim. Ammo tun sovug`i tufayli tan-badanim bir zumda muzlab qoldi. Vaqt o`tgan sayin oyoqlarim loyga botib, cho`ka boshladim. Ilojsiz qolganimdan «Yordam beringlar!», deya qichqira boshladim. Yarim tun bo`lgani uchun yon-atrofda hech kim ko`rinmadi. Sovuqdan titray boshladim. Jon talvasasida yordam so`rab qichqirishda davom etdim.
Oradan bir muncha vaqt o`tgach, kanal qirg`og`ida bir yigit paydo bo`ldi. Xaloskorimni ko`rib, sevinchim ichimga sig`may ketdi. U menga yordam berishga ko`zi etmadimi, darhol kimgadir qo`ng`iroq qila boshladi. Oradan ko`p vaqt o`tmay PPX bataloni xodimlari etib kelishdi va qahraton qishning sovug`iga qaramay suvga tushib meni kanaldan olib chiqishdi. Ichkilik tufayli mana shunday noxush ahvolga tushib qolganimdan juda-juda afsusdaman. Bu hodisa menga chinakam saboq bo`ldi. Xaloskorlarimning o`z vaqtida ko`rsatgan beg`araz yordami tufayli omon qoldim. O`zim va oilam nomidan bu fidoyi insonlarga minnatdorlik bildiraman. Doimo xalqimizning hurmat-e`tiborida bo`lishsin!
