Ayrim ommaviy axborot vositalarida Turkiyada zilzila qurbonlari orasida shaxsi aniqlanmagan murdalar kimsasiz qabristonlarga ko`milayotgani aytilgan xabarlar tarqaldi. Turkiya respublikasi prezidenti huzuridagi Kommunikasiyalar boshqarmasi ushbu xabarlarni rad etdi.
Ta`kidlanishicha, zilzila sabab halok bo`lganlarning shaxsini aniqlash sinchkovlik bilan amalga oshirilib, jasadlari zudlik bilan yaqinlariga etkazilmoqda.
Ma`lum qilinishicha, qidiruv-qutqaruv ishlari davomida topilgan va shaxsini aniqlash imkoni bo`lmagan jasadlar uchun shaxsini aniqlash maqsadida maxsus fotosuratlar olinib, barmoq izlari va DNK namunalari olingandan so`ng murdaga raqam beriladi va qayd qilinadi. Jasadlarning dafn etilish ruxsatnomasi rasmiylashtirilganidan so`ng, joy va qabriston raqamlanib, bayonnoma bilan qayd qilinadi va jasad dafn etiladi. Keyinchalik uning qarindoshlari chiqsa barmoq izlari va DNK namunalari orqali shaxsiga aniqlik kiritilib, qabrga uning nomi yoziladi.
