Jahongir Otajonov to`yga qimmatga chiqishi sabablari va konsertdan oladigan foydasi haqida

Joriy yilning iyun oyida “Istiqlol san`at saroyida o`zining “Ishtiboh” nomli yakkaxon konsert dasturini taqdim etgan xonanda Jahongir Otajonov oradan 4 oy o`tib o`zining yangi konsert dasturi haqida e`lon qildi.

Kuni kecha poytaxtimizning “Yoshlar ijod saroyi”da xonanda yangi konsert dasturi oldidan jurnalistlar uchun matbuot anjumani o`tkazildi.

Xonanda tadbir davomida jurnalistlarni qiziqtirgan savollarga javob berar ekan bir yil hisobidan nima sababdan ikkinchi konsertni taqdim etishga jazm qilgani haqida gapirdi:

“So`nggi 15-20 yil davomida ijod qilayotgan san`atkorlar bir necha kunlab konsert berishayotganini guvohi bo`lyapman, to`g`risi, men ham aynan shunday qilgim keladi, lekin uch kundan keyin ovozimning sifati qochishni boshlaydi, shu sababdan bundan ko`p konsert bermayman. To`g`ri ovozni sifati qochayotganini muxlis sezmasligi mumkin, lekin tashrif buyurayotgan tomoshabinni sifatsiz mahsulot bilan alday olmayman. Shu sababdan yozda bergan konsert dasturimdan so`ng, yangi ashulalar yoza olsam kuzda yana konsert qilaman, shunda men ham bir yilda 5-6 kun konsert bergan bo`laman, deb niyat qilgandim. Agar nasib qilsa keyingi dasturimni mart oyida ham muxlislarimga havola etaman. Keyinchalik esa har chorakda konsert berib, muxlislarim bilan uchrashish niyatim bor.”

Ma`lumki, Jahongir Otajonov to`y xizmatlariga qimmatga chiqadigan san`atkorlardan biri hisoblanadi, buning sababini esa u quyidagicha izohladi:

“To`yga ham aynan mana shu sababli qimmat narx aytaman, birinchidan mehnatim og`ir, ikkinchidan narxni qimmat aytganim hisobiga to`yga kamroq boraman, ya`ni ataylab to`ylarim kamayishi uchun narxni qimmat qo`yganman. Agar tez-tez to`yga chiqadigan bo`lsam ovozimning sifati qochadi, keyin fonogramma kuylashga majbur bo`laman, meni jonli ijro aytadi deb chaqirgan odam esa bundan og`rinishi mumkin. Shu sababdan sun`iy ravishda narximni baland qilganman.

To`yga kam chiqqanim sababli shou-biznesdagi harajatlarimni qoplash uchun konsertdan pul tushirish niyatim bor.”

Aksariyat san`atkorlar konsertdan foyda olmasligini aytganini guvohi bo`lganmiz, biroq Jahongir Otajonov buning aksini ta`kidladi:

“To`g`ri konsert harajatlari kichkina emas. Qilmaslik ilojsiz bo`lgan harajatlari bor. Meni oldimga qo`ygan aniq strategiya bor: konsertimga tushgan muxlis keyingi konsertimga ham kelishini hisobga olaman va shunga intilaman. 2 kunda 8 ming odam tushsa yana shuncha odam keyingi safar ham qaytib kelishi kerak, buning uchun esa kirgan tomoshabin konsertdan ma`naviy ozuqa, lazzat olib chiqib ketishini ta`minlash shart.

Konsert faoliyatimni boshlaganimga 5 yildan ko`p vaqt bo`lgan bo`lsa, aytishim mumkinki, konsertlarimdan o`ziga yarasha foyda ko`rsam ko`ramanki, zarar ko`rmayman. Buning sababi ehtimol reklamaga katta pul sarflamaganimdadir. Reklama qilmaganimning sababi reklamaga muhtoj emasligimdamas, albatta. Shunchaki yuqorida aytganimday konsert qilayotganimda avvalgi konsertimga tushgan odam albatta kelishiga ishonaman.

Dunyo saxnalaridagi konsertlarni kuzating, u erda asosiy maqsad kuy bilan, san`at bilan o`tirgan muxlisni sehrlab qo`yish. Buning uchun albatta inson o`ziga va san`atiga ishonishi kerak. Konsertga tushgan 4000 tomoshabin 2 soat jonli ijrodagi konsert tugab qolganini sezmay qolishi kerak. Kosnertimdagi yangiliklarga to`xtaladigan bo`lsam, asosan bu yangi qo`shiqlar, rejissyorlar bilan ishlamayman sahnada ichki tuyg`ularimga va o`z g`oyalarimga ishonaman va ular asosida ish tutaman, oldindan ssenariy ham bo`lmaydi. Oldindan ssenariy tuzib, uning asosida hatti-harakat qilish uchun aktyor bo`lish kerak, menda esa aktyorlik qobiliyati yo`q. Menda asosan improvizasiya. Ba`zida musiqachilarim hazillashib “asboblarniyam o`ziz chalaqoling” deb kulishadi. Muxlislarimga bera oladiganim faqat yangi taronalarim, san`atim. Mening muxlislarimga ham faqat shu kerak deb o`ylayman.”

Eslatib o`tamiz, xonanda Jahongir Otajonov 28-29 oktyabr kunlari “Istiqlol” san`at saroyida o`zining yangi “Kuz gullari” deb nomlangan jonli ijrodagi konsert dasturini taqdim etadi.