Sog`liqni saqlash vazirining 2023 yil 5 sentyabrdagi tegishli buyrug`i bilan Tibbiyot va farmasevtika xodimlarining malakasini baholash markazi huzuridagi vrachlar va farmasevtlarga malaka toifasini berish bo`yicha appelyasiya komissiyasi va jami 39 ta tibbiy yo`nalishdagi ixtisoslashtirilgan attestasiya komissiyalari tarkibi tasdiqlandi. Bu haqda Sog`liqni saqlash vazirligi xabar berdi.
Ushbu attestasiyalarni ZOOM dasturi orqali onlayn shaklda o`tkazish tartiblari ham ishlab chiqildi.
Mazkur yangi tartib shu yil sentyabr oyidan boshlab sinov tariqasida vrach va farmasevtlarga, 2024 yil 1 yanvardan boshlab esa barcha tibbiyot va farmasevtika xodimlariga bosqichma-bosqich tatbiq etiladi.
ZOOM dasturi orqali og`zaki imtihon (suhbat) o`tkazish Toshkent shahri va viloyati uchun Tibbiyot va farmasevtika xodimlarining malakasini baholash markazi binosida zarur qurilmalar bilan jihozlangan xonalarda, Qoraqalpog`iston Respublikasi va viloyatlardagi mutaxassislar uchun Markazning hududlardagi ana shunday xonalarida o`tkaziladi.
Imtihon jarayonida talabgor uchun "Random" dasturi orqali tasodifiy tarzda bilet tanlanadi.
Biletlar 5 ta savoldan iborat bo`lib, ularga javob berish uchun ko`pi bilan 15 daqiqa vaqt beriladi va 10 ballik tizimda baholanadi.
Imtihon yakunida "Random" dasturi umumiy ballarning o`rtacha qiymatini hisoblab beradi va o`sha zahoti e`lon qiladi.
Vazirlik tomonidan bu jarayonlarni tashkil etishda texnik va dasturiy vositalar uzluksizligini ta`minlash bo`yicha mas`ullarga zarur vazifalar yuklatildi.
