Davlat xavfsizlik xizmatining Jizzax viloyati bo`yicha boshqarmasi xodimlari tomonidan viloyat bojxona boshqarmasi bilan hamkorlikda tezkor tadbir o`tkazildi. Bu haqda darachi.uz'ga DXX Matbuot xizmati xabar bermoqda.
Unda, Tojikiston Respublikasining So`g`d viloyati Panjikent tumanida yashovchi, 1970 y.t. Tojikiston Respublikasi fuqarosi Jizzax viloyatining Baxmal tumanida yashovchi, 1983 va 1984 yillarda tug`ilgan 2 nafar tanishi bilan o`zaro til biriktirib, Tojikiston Respublikasidan kontrabanda yo`li bilan keltirilgan
9 kg 530 gr “opiy” moddasini 55 ming AQSh dollariga sotgan vaqtlarida ushlandi.
DXX xodimlari tomonidan viloyat IIB bilan hamkorlikda Zomin tumanida o`tkazilgan tezkor tadbirda esa 1958, 1976 va 1985 yillarda tug`ilgan 3 nafar Tojikiston Respublikasi fuqarolari ushlanib, ulardan 2 kg 986 gr. «gashish» moddasi prosessual tartibda rasmiylashtirib olindi.
Shuningdek, tezkor tadbir davom ettirilib, ularni Dashtobod shaharchasidagi umumiy ovqatlanish maskanida kutib turgan, 1979 y.t. yana bir Tojikiston Respublikasi fuqarosi ushlandi.
Aniqlanishicha, ushbu giyohvandlik vositasi ham Tojikistondan olib kelingan.
DXX Qashqadaryo viloyati bo`yicha boshqarmasi xodimlari tomonidan viloyat bojxona va ichki ishlar boshqarmalari bilan hamkorlikda o`tkazilgan tezkor tadbirda, «Buxoro - Qashqadaryo» yo`nalishida harakatlanayotgan, Buxoro shahrida yashovchi, 1982 y.t. shaxs boshqaruvidagi «Matiz» rusumli avtomashina Muborak tumanidagi «Shirinbuloq» YPX maskanida to`xtatilib, ko`zdan kechirildi.
Natijada avtomashinada u bilan birga kelayotgan hamshahari, 1998 y.t. fuqaroning yonida 973 gr. «geroin» moddasi borligi aniqlanib, tegishli tartibda rasmiylashtirib olindi.
Dastlabki surishtiruv harakatlari davomida, Buxoro viloyatining Kogon tumanidagi dala maydoniga 1 kg 968 gr. «geroin» moddasi ko`mib qo`yilganligi aniqlanib, ushbu giyohvandlik vositasi ham prosessual tartibda rasmiylashtirib olindi.
Hozirda ushbu holatlar yuzasidan Davlat xavfsizlik xizmatining joylardagi tergov bo`limlari tomonidan mazkur shaxslarga nisbatan Jinoyat Kodeksining 246- va 273-moddalari bilan jinoyat ishlari qo`zg`atilib, qamoqqa olish tarzidagi ehtiyot chorasi qo`llanilgan.
Tergov harakatlari olib borilmoqda.
