Prezident Farmoni bilan ayrim Prezident hujjatlari yangi tahrirdagi Konstitusiyaga muvofiqlashtirildi.
Prezidentning “Yangi tahrirdagi O`zbekiston Respublikasi Konstitusiyasi qabul qilinganligi munosabati bilan O`zbekiston Respublikasi Prezidentining ayrim hujjatlariga o`zgartirish va qo`shimchalar kiritish to`g`risida”gi Farmoni qabul qilindi.
Farmon bilan O`zbekiston Respublikasi Prezidentining
14 ta hujjatlariga quyidagilarni nazarda tutuvchi o`zgartirish
va qo`shimchalar kiritildi, xususan:
1) Sudyalar oliy kengashi raisi va a`zolarini, Korrupsiyaga qarshi kurashish agentligi direktorini hamda Raqobatni rivojlantirish va iste`molchilar huquqlarini himoya qilish qo`mitasi raisini O`zbekiston Respublikasi Prezidentining taqdimiga binoan Oliy Majlis Senati tomonidan saylash tartibi ko`zda tutildi;
2) yangi tahrirdagi Konstitusiyaning davlat xizmatini o`tash bilan bog`liq cheklovlar qonun bilan belgilanishi talabidan kelib chiqib, qonunosti hujjatlardan bunday cheklovlar chiqarildi;
3) mehnatga haq to`lashning eng kam miqdorini belgilashda insonning munosib turmush darajasini ta`minlash zarurati hisobga olinishi belgilab qo`yildi.
Shu bilan birga, Farmonda qonunchilikni yangi tahrirdagi Konstitusiyaga muvofiqlashtirish bo`yicha ishlarni davom ettirish maqsadida mas`ul vazirlik va idoralarga bir qator topshiriqlar berildi.
Xususan, quyidagi sohalarda konstitusiyaviy prinsiplarni ro`yobga chiqarish bo`yicha alohida topshiriq berildi:
birinchidan, mulk huquqining konstitusiyaviy kafolatlarini ta`minlash, shu jumladan, mulkdor o`z mol-mulkidan qonunda nazarda tutilgan hollardan va tartibdan tashqari hamda sudning qaroriga asoslanmagan holda mahrum etilishi mumkin emasligi haqidagi konstitusiyaviy normadan kelib chiqib, ushbu masalalarni faqat qonunlar bilan belgilash;
ikkinchidan, davlat organlari tomonidan insonga nisbatan qo`llaniladigan huquqiy ta`sir choralari (jinoiy va ma`muriy jazo choralari, shu jumladan, jarima, musodara qilish, shuningdek, moliyaviy sanksiya, penya, lisenziyani to`xtatish yoki bekor qilish va boshqalar) mutanosiblik prinsipiga asoslanishi va qonunlarda nazarda tutilgan maqsadlarga erishish uchun etarli bo`lishi kerakligi to`g`risidagi konstitusiyaviy normadan kelib chiqib, qonunosti hujjatlaridagi huquqiy ta`sir choralarini qaytako`rib chiqish;
uchinchidan, insonning huquq va erkinliklarini faqat qonunga muvofiq cheklanishi mumkinligi to`g`risidagi konstitusiyaviy talab asosida barcha qonunosti hujjatlarini qayta ko`rib chiqish;
to`rtinchidan, uy-joy daxlsizligi huquqini ta`minlash, hech kim sudning qarorisiz va qonunga zid tarzda uy-joyidan mahrum etilishi mumkin emasligiga oid konstitusiyaviy normalardan kelib chiqib, qonunosti hujjatlarini qayta ko`rib chiqish;
beshinchidan, O`zbekiston Respublikasi hududida iqtisodiy makon birligi, tovarlar, xizmatlar, mehnat resurslari va moliyaviy mablag`lar erkin harakatlanishi to`g`risidagi konstitusiyaviy normaga muvofiq qonunosti hujjatlarini qayta ko`rib chiqish.
Mazkur Farmon qonunosti hujjatlarini yangi tahrirdagi Konstitusiyaga muvofiqlashtirish orqali konstitusiyaviy prinsiplarni ro`yobga chiqarishga, davlat organlari faoliyati yangicha konstitusiyaviy-huquqiy sharoitlar asosida yo`lga qo`yishga, shuningdek, mulk huquqi daxlsizligini ta`minlash choralarini ko`rishga qaratilgan.
