Er maydonlarini noqonuniy tarzda sotish holatlariga chek qo`yildi, deya xabar bermoqda "darakchi.uz"ga DXX matbuot xizmati.
Ma`lum qilinishicha, Davlat kadastrlari palatasining Toshkent viloyati O`rtachirchiq tumani filiali xodimi va 1981 y.t. shaxs o`zaro til biriktirib, dehqonchilik bilan shug`ullanmoqchi bo`lgan fuqaroga tumandagi fermer xo`jaliklaridan biriga tegishli 17 gektar er maydonini ijaraga olib berish evaziga 15 ming AQSh dollari talab qilishadi.
Ular so`ralgan pul mablag`ini olgan vaqtlarida Davlat xavfsizlik xizmati va Iqtisodiy jinoyatlarga qarshi kurashish departamenti xodimlari tomonidan jinoyat ustida qo`lga olindi.
Qashqadaryo viloyatida kuzatilgan holatda Qarshi tumanida istiqomat qiluvchi shaxs aldov yo`li bilan o`zganing ishonchiga kirib, unga tuman hokimligi zaxirasida bo`lgan 55 sotix er maydonini mansabdor tanishlari orqali olib berish evaziga 55 ming AQSh dollari talab qiladi.
Davlat xavfsizlik xizmati xodimlari tomonidan boshqa huquqni muhofaza qiluvchi idoralar bilan hamkorlikda o`tkazilgan tezkor tadbirda, u so`ralgan pul mablag`idan 11 ming AQSh dollarini olgan vaqtida ashyoviy dalillar bilan ushlandi.
DXX Farg`ona viloyati bo`yicha boshqarmasi xodimlari tomonidan boshqa huquqni muhofaza qiluvchi idoralar bilan hamkorlikda o`tkazilgan tezkor tadbirda, Farg`ona tumanida yashovchi, muqaddam firibgarlik bilan bog`liq jinoyati uchun sudlangan shaxs bog`dorchilikka ixtisosolashgan fermer xo`jalikning 13 gektar er maydonini xaridorga 20 ming AQSh dollariga sotishga va hokimiyatdagi tanishlari orqali uning nomiga rasmiylashtirib berishga kelishib, oldindan 10 ming AQSh dollari olgan vaqtida ushlandi.
Sirdaryo viloyatining Boyovut tumanidagi dehqon xo`jalik rahbari tuman hokimining 2019 yildagi qarori bilan dehqon xo`jaligi tashkil etish hamda vaqtincha foydalanish uchun ajratilgan 2 gektar er maydonini xaridorga 300 mln. so`mga sotishga kelishadi.
DXX Sirdaryo viloyati bo`yicha boshqarmasi xodimlari tomonidan viloyat IIB bilan hamkorlikda o`tkazilgan tezkor tadbirda dehqon xo`jalik rahbari talab qilingan pul mablag`idan 8200 AQSh dollarini olgan vaqtida ashyoviy dalillar bilan ushlandi.
Hozirda barcha holatlar yuzasidan mazkur shaxslarga nisbatan Jinoyat Kodeksining tegishli moddalari bilan jinoyat ishlari qo`zg`atilib tergov harakatlari olib borilmoqda.
