Prezident boshchiligidagi yig`ilish davom etmoqda.
“Qanchalik qiyin bo`lmasin, oxirgi besh yilda qishloq xo`jaligidan 42,5 ming gektarni qisqartirib, aholi punktlari va sanoat erlari toifasiga o`tkazib berdik.
Afsuski, katta-katta va`dalarni bergan ayrim viloyat, tuman va shahar hokimlari bu erlardan samarali foydalana olmayapti”, - dedi Prezidentimiz.
Xususan, 100 ta tumanda toifasi o`zgargan 17,5 ming gektar er na tadbirkorga berilgan, na auksionga chiqarilgan. Bu erlar olinganidan buyon zaxirada yotgani tanqid qilindi.
Viloyat hokimlari yil yakuniga qadar bu erlar auksionga chiqarilmasa, qishloq xo`jaligi toifasiga qaytarilishi haqida ogohlantirildi.
Shuningdek, toifasi o`zgarib, tadbirkorlarga ajratilgan 19 ming 300 gektar erdan 5 ming 400 gektari bo`sh turibdi. Sanoat zonalarida ham loyiha joylashtirilmagan erlar bor. Aksincha, tayyor infratuzilmasi bo`lgan sanoat erlaridan boshqa maqsadda foydalanish ko`p uchramoqda.
Toifasi o`zgargan erlar evaziga shu yilning oxirigacha 15 ming gektar yangi erlar o`zlashtirilishi kerak edi. Biroq, 8 ming gektar erlar haligacha o`zlashtirilmagan.
Yil yakunigacha yangi erlarni o`zlashtirish va`dasini bajarmagan hokimlar jarimaga tortilishi, ularning er toifasini o`zgartirish bo`yicha takliflari umuman qabul qilinmasligi ko`rsatib o`tildi.
Kadastr agentligiga 2024 yil 1 martga qadar barcha sanoat erlarini to`liq xatlovdan o`tkazish, viloyat hokimlariga esa 2021 yilgacha ajratilib, qurilish boshlanmagan 7 ming gektar erni zaxiraga qaytarish topshirildi.
Bosh prokuraturaga bu borada qonun ustuvorligi va jazo muqarrarligini ta`minlash vazifasi qo`yildi.
Bundan buyon viloyat kadastr boshlig`ini ishga qo`yish va ishdan olish Bosh vazir tomonidan amalga oshirilishi belgilandi.
