22 noyabr kuni Evropa Ittifoqi Preferensiyalarning bosh tizimi plyus (“GSP+”) amaldagi muddatini kelgusi to`rt yilga, ya`ni
2027 yil 31 dekabrga qadar uzaytirish bo`yicha qaror qabul qilindi.
Bu haqida 2023 yilning 23 noyabr kuni Investisiyalar, sanoat va savdo vazirligi va Evropa Ittifoqining O`zbekistondagi Delegasiyasi tomonidan birgalikda “O`zbekiston uchun Evropa Ittifoqining Preferensiyalar bosh tizimi plyus (“GSP+”) imkoniyatlarini kengaytirish” mavzusida o`tkazilgan matbuot anjumanida e`lon qilindi.
Ushbu tadbirda Investisiyalar, sanoat va savdo vazirligi, Evropa Ittifoqining O`zbekistondagi delegasiyasi, Evropa Ittifoqiga a`zo davlatlarning O`zbekistondagi elchixonalari, vazirlik va idoralar, xususiy sektor hamda mahalliy va xorijiy ommaviy axborot vositalari vakillari ishtirok etdi.
Matbuot anjumani ochilishida Evropa Ittifoqining O`zbekistondagi Elchisi Sharlotta Adrian quyidagilarni ta`kidladi:
“GSP+” doirasida Evropa Ittifoqi va O`zbekiston o`rtasidagi yaqin hamkorlikninghaqiqiy muvaffaqiyat tarixiga aylanib borayotganini ko`rishdan mamnunman. Bu mamlakatingizdagi xususiy sektorga katta turtki bo`lib, 448 million iste`molchiga ega Evropa bozorlariga kirishni osonlashtiradi, Evropa va O`zbekiston kompaniyalari o`rtasida mustahkam hamkorlikni rag`batlantiradi va chegaralarda sezilarli tejashlarga olib keladi.
Siyosiy nuqtai nazardan, “GSP+” BMTning 27 ta konvensiyasini amalga oshirish orqali inson va mehnat huquqlari, samarali boshqaruv va atrof-muhitni muhofaza qilish sohalarida xalqaro standartlarga erishish bo`yicha O`zbekistonning strategiyasini to`liq mos keladi.
“GSP+” muddatini uzaytirish xususiy sektor uchun ishlarini yanada samarali rejalashtirish imkonini beradi va Evropa Ittifoqining O`zbekistondagi islohotlar jarayonini qo`llab-quvvatlash bo`yicha sodiqligining qo`shimcha belgisihisoblanadi”.
Shuningdek, ushrashuv davomida O`zbekiston Rsepublikasi investisiyalar, sanoat va savdo vaziri o`rinbosari Badriddin Abidov ham so`zga chiqib, quyidagilarni aytib o`tdi:
“Evropa Ittifoqi O`zbekistonga “GSP+” benefisiar mamlakati maqomini berishi va ushbu imtiyozlar muddatini uzaytirish bo`yicha qabul qilgan qarori bugungi kunda O`zbekiston Respublikasi Prezidenti Shavkat Mirziyov rahbarligida mamlakatda olib borilayotgan keng qamrovli islohotlar, jumladan davlat boshqaruvi va fuqarolik jamiyatining kuchli institutlariga ega demokratik davlatni shakllantirish bo`yicha aniq o`zgarishlarning yaqqol xalqaro e`tirofidir.
“GSP+” doirasidagi imtiyozlardan ijobiy foydalanish bilan bir qatorda biz kelgusida ham ushbu mexanizm monitoringi jarayonlarida Evropa Ittifoqi bilan hamkorlik qilish va tegishli xalqaro konvensiyalar talablarini amalga oshirishda birga ishlashga tayyorligimizni bildiramiz.
Shu bilan birga, Evropa Ittifoqi bilan “GSP+” doirasidagi hamkorligimiz mamlakatimizda bozor iqtisodiyotini shakllantirish bo`yicha amalga oshirilayotgan tub islohotlarni yanada kengaytirish maqsadida evropa tomoni bilan savdo-iqtisodiy va investisiyaviy aloqalarimizni yanada kengaytirishda sezilarli turtki bo`lishidan manfaatdormiz”.
Shuningdek, tadbirda so`zga chiqqan “O`zto`qimachiliksanoat” uyushmasi raisi maslahatchisi Shahzoda Quchqorova va “O`zeltexsanoat” uyushmasi raisi maslahatchisi Bektemir Murodov tomonidan “GSP+” doirasida taqdim etilayotgan imtiyozlarning mamlakatning yuksak salohiyatga ega bo`lgan to`qimachilik va elektrotexnika sanoatlaridagi ahamiyati alohida e`tirof etildi.
Ta`kidlash joiz, Evropa Ittifoqi bilan savdo munosabatlarini mustahkamlash va O`zbekistonning eksport geografiyasini kengaytirish yuzasidan amalga oshirilgan chora-tadbirlar natijasida, 2022 yil yakuni holatiga 628 ta korxona tomonidan (2021 yilning mos davriga nisbatan 116 ta ortiq) 647 mln. dollar miqdorida, ya`ni 2020 yilga nisbatan (292 mln.dollar) qariyb 2 barobardan ortiq hajmdagi mahalliy mahsulotlar Evropa bozorlariga chiqarilgan.
Jumladan, “GSP+” doirasidagi imtiyozlar asosida to`qimachilik sanoatida – 177,4 mln. doll. (2021 yilga nisbatan o`sish – 126,4 foiz), kimyo sanoatida – 138,3 mln. doll. (4,7 barobar), qishloq ho`jaligi va oziq ovqat sanoatida – 19,7 mln. doll. (103 foiz), elektrotexnika sanoatida – 9 mln. doll. (117 foiz) miqdoridagi mahsulotlar Evropa bozoriga eksport qilindi.
2022 yilda “GSP+” tufayli o`zbekistonlik eksportchilar 28 million evroga teng import bojlarini tejab qolishdi. Bu Evropa Ittifoqining O`zbekiston xususiy sektorini rivojlantirishga qo`shgan katta hissasidir. 2019 va 2022 yillar oralig`ida bu ko`rsatkich o`n baravardan ko`proq o`sdi.
Evropa Ittifoqi “GSP+” monitoringi Komissiyasining bo`lib o`tgan matbuot anjumanida e`lon qilingan hisobotida O`zbekiston xotin-qizlar huquqlari va gender tenglik, zo`ravonlikka qarshi kurashish, iqtisodiy va ijtimoiy huquqlarni yaxshilash bo`yicha bir qator qonun hujjatlarini qabul qilish orqali BMT konvensiyalarini amalga oshirishda muhim yutuqlarga erishgani e`tirof etilgani ta`kidlandi.
“GSP+” imtiyozlar tizimining benefisiar maqomi O`zbekiston va Evropa biznesi vakillari o`rtasida o`zaro manfaatli savdo-iqtisodiy munosabatlarni kengaytirish imkoniyatini yaratadi.
Yana bir ijobiy jihati – aholi farovonligiga ijobiy ta`sir ko`rsatilayotganligi, ya`ni savdo aloqalarining chuqurlashishi mamlakatimizda ishbilarmonlikni kengaytirish va yangi ish o`rinlari yaratishga xizmat qilmoqda.
