Ijtimoiy tarmoqlarda Sergeli tumanidagi 284-sonli maktab tenderdan 10 ta elektron doskani yutgani, endilikda doskalar uchun har bir sinf ota-onalaridan 100 dollardan pul yig`ib berish talab qilinayotgani haqida xabarlar tarqaldi.
Holat yuzasidan Toshkent shahar maktabgacha va maktab ta`limi boshqarmasi izoh berdi.
Aniqlanishicha, Sergeli tumanidagi 284-sonli umumta`lim maktabi 2023 yilning 1-mavsumida “Tashabbusli budjet” platformasi orqali yutib olgan 1 200 000 000 so`m mablag` evaziga 23 dona elektron doska xarid qilingan. 2023 yilning 2-mavsumida esa “Tashabbusli budjet” platformasi orqali yana 1 300 000 000 so`m mablag` yutib olinib, 20 dona elektron doska olingan va sinflarga tarqatilgan. Elektron doskalar uchun o`quvchilar va ularning ota-onalaridan hech qanday pul mablag`lari yig`ilmagan.
