Qirg`iziston prezidenti Sadir Japarov AQSh davlat kotibi Entoni Blinkenga yo`llagan javob xatida Vashingtonni respublikaning ichki ishlariga aralashmaslikka chaqirdi, deb xabar qildi Japarov matbuot xizmati.
Avvalroq AQSh Davlat kotibi Qirg`iziston prezidentiga maktub yo`llab, respublika parlamentida ko`rib chiqilayotgan “Notijorat tashkilotlari to`g`risida”gi qonun loyihasidan xavotir bildirgan edi.
Japarov o`z javobida qonun loyihasining maqsadi Qirg`izistonda faoliyat yuritayotgan nodavlat/notijorat tashkilotlari faoliyatini tartibga solish ekanligini tushuntirgan.
Unga ko`ra, Qirg`iziston hukumati nodavlat tashkilotlar va ommaviy axborot vositalari faoliyatini qo`llab-quvvatlaydi, biroq mamlakat Konstitusiyasi va qonunlari, jumladan, Soliq kodeksi normalariga rioya qilishni talab qiladi.
“Jamiyat va davlat u yoki bu nodavlat notijorat tashkilotini moliyalashtirish qaerdan, qaysi xorijiy manbalardan va qanday maqsadlarda amalga oshirilayotganini bilishi kerak.Bizning ularga qo`yayotgan talablarimiz aniq va jamiyatda qo`llab-quvvatlanadi, Konstitusiyamizga ham, xalqaro hamjamiyatimizga to`liq mos keladi. Biroq “erkin ommaviy axborot vositalari va nodavlat notijorat tashkilotlari” vakillari, davlat organlari tashabbusi bilan ishlab chiqilgan xorijiy agentlar, ommaviy axborot vositalari, nodavlat notijorat tashkilotlari to`g`risidagi qonun loyihalari dushmanlik bilan qabul qilindi”, — dedi Japarov.
Shu bilan birga, u Blinken o`z tushuntirishlari va kafolatlariga tayangan holda, ayrim amerikalik sheriklarning Qirg`izistondagi faoliyatini davom ettirishi uchun qo`rquvlarini yo`qqa chiqarishiga umid bildirdi.
Fursatdan foydalanib, sizlarni mamlakatimizga tashrif buyurishga va Qirg`izistonda inson huquq va erkinliklari respublika Konstitusiyasi va qonunlari bilan ishonchli himoyalanayotganini o`z ko`zingiz bilan ko`rishga taklif qilish sharafiga muyassar bo`ldim”, — dedi Japarov.
Qirg`iziston parlamentining bir guruh deputatlari nodavlat notijorat tashkilotlari to`g`risidagi qonun va Jinoyat kodeksiga o`zgartirishlar kiritishni taklif qildi. Qonun loyihasiga ko`ra, xorijdan mablag` oladigan va siyosiy faoliyat bilan shug`ullanuvchi nodavlat notijorat tashkilotlari “xorijiy vakil” maqomini oladi va maxsus reestrga kiritiladi. Fuqarolarning shaxsi va huquqlarini buzuvchi NNT tashkil etganlik uchun jarima va o`n yilgacha ozodlikdan mahrum qilish tarzidagi jinoiy jazolar joriy etiladi.
Deputatlar qonun loyihasini birinchi o`qishda qabul qilib bo`lgan, bu esa ayrim xalqaro tashkilotlarning tanqidiga sabab bo`lgan.
