O`zbekiston va Ispaniya o`rtasida oliy ta`lim sohasida hamkorlik aloqalarini yanada jadallashtirish maqsadida joriy yilning 15-16 aprel kunlari Ispaniya Ta`limni xalqarolashtirish xizmati direktori Alfonso Xentil Alvares-Ossorio boshchiligidagi delegasiya amaliy safar bilan O`zbekistonga keldi. Bu haqda "Dunyo" AA muxbiri xabar bermoqda.
Maqsad – ikki mamlakat oliy ta`lim muassasalari o`rtasida hamkorlik aloqalarini kengaytirish, Evropa Ittifoqining "Erazmus+" ta`lim dasturi doirasida turli loyihalarda ishtirok etishni ta`minlash masalalarini muhokama qilishdan iborat.
Ispaniya delegasiyasi tarkibidan mamlakatning Alikante, Almeriya, Valyadolid, Granada, Uelva, Xaen, Lerida, Salamanka, Seviya, San Xorxe kabi etakchi universitetlari va Evro-Arab jamg`armasi vakillari o`rin olishi rejalashtirilgan.
Tashrif chog`ida Samarqand va Toshkent shaharlarida ikki mamlakat oliygohlari vakillari ishtirokida seminar va B2B formatidagi uchrashuvlar bo`lib o`tadi.
Safar oldidan ikki mamlakat oliy ta`lim muassasalari vakillari ishtirokida vebinar tashkil etildi.
Muloqot davomida Ispaniya universitetlari vakillari ta`lim muassasalari faoliyati haqida taqdimotlar tashkil etdilar va hamkorlik bo`yicha o`z takliflarini ilgari surdilar.
Vebinar ishtirokchilari joriy yilning 15-16 aprel kunlari Toshkent va Samarqand shaharlarida bo`lib o`tadigan uchrashuvlarda muloqotni davom ettirish va hamkorlik istiqbollarini belgilab olishga kelishib oldilar.
