"Potrebitel.uz" guruhida “Soliq” mobil ilovasidagi xizmatlardan biri noto`g`ri talqin qilingan xabar e`lon qilindi. Soliq qo`mitasi matbuot xizmati xabarga munosabat bildirdi.
OFD - bu Olingan foyda daromadi (poluchenne doxod) emas, fiskal ma`lumotlar operatori (ofd.uz).
Soliq qo`mitasi avvalroq yangilangan Soliq mobil ilovasida “Fiskal modul uchun to`lov” bo`limi qo`shilgani va fiskal modul uchun to`lov tadbirkorlik sub`ektlaridan undirilishi haqida xabar bergan edi.
Eslatib o`tamiz, Fiskal modul – bu tadbirkorlar o`z faoliyatida foydalanadigan onlayn-nazorat kassa texnikalari uchun dasturiy ta`minotga ega maxsus qurilma.
Fiskal modul uchun to`lov faqat onlayn-NKTdan foydalanuvchi tadbirkorlik subektlaridan (yuridik shaxs, YTT) – yiliga bir marta BHMning 1 baravari (340 000 so`m) miqdorida undiriladi.
Agar siz tadbirkor bo`lmasangiz, fiskal modul uchun to`lov qilishingiz shart emas.
Agar Soliq mobil ilovasida fiskal modul uchun xatolik bilan to`lov qilingan bo`lsa, “Yangi texnologiyalar” IAM buxgalteriya bo`limiga info@yt.uz elektron pochta manzili orqali xat yoborish lozim.
Xatda vaziyat haqida aniq ma`lumot bayon qilish, pasport nusxasi (JShShIR aniqlash uchun) va pul o`tkazilganligini tasdiqlovchi hujjat (chek, kvitansiya, bank ma`lumotnomasi va boshqa) ilova qilish hamda pul mablag`ini qaytarish uchun bank kartasi tranzit raqami va MFO ko`rsatilishi lozim.
Eslatib o`tamiz qonunchilikka ko`ra, murojaatlar 15 kundan 30 kungacha ko`rib chiqiladi.
Ariza ko`rib chiqilgan so`ng pul mablag`i xatda ko`rsatilgan bank kartasiga avtomatik ravishda qaytariladi, deyiladi xabarda.
Blogerlar va ommaviy axborot vositalari vakillaridan soliq yoki soliq xizmatlariga oid savollar tug`ilganda, materiallarni chop etishda oldin tushuntirish berish yuzasidan Soliq qo`mitasi matbuot xizmatiga qayta aloqa tizimi orqali murojaat qilishlari so`raladi:
sayt - https://appeal-bot.soliq.uz/;
Soliq mobil ilovasida - https://t.me/soliqnews/13128.
