USM Holdings asoschisi, milliarder Alisher Usmonov Frankfurt Mayn hududiy sudiga UBS Europe SE bankiga qarshi da`vo arizasi bilan murojaat qildi. Bu haqda tadbirkorning advokat Stefani Rabenau “Kommersant” nashriga xabar berdi.
Da`vogarning fikricha, 2018–2022 yillarda bank Germaniya moliya organlariga shubhali moliyaviy operasiyalarni amalga oshirgani haqida “bir qator asossiz xabarnomalar” yuborgan. Bu esa Alisher Usmonovga qarshi “siyosiy sabablarga ko`ra surishtiruvlar” o`tkazilishiga turtki bo`lgan.
Advokat Rabenauning ta`kidlashicha, UBS banki Germaniyadagi Bojxona bosh boshqarmasining moliyaviy monitoring bo`limiga “o`ndan ortiq absurd va asossiz xabarnomalar” jo`natgan. Ular orasida naqd pul echib olish va ijara to`lovlarida “pul yuvish” da`volari bor.Shu bilan birga, bank o`z shubhalarini tasdiqlovchi hech qanday fakt keltirmagan, deya qayd etadi advokat.
Bundan tashqari, 2022 yilda UBS bankining xabarnomalari Germaniyada Alisher Usmonovga qarshi surishtiruv boshlanishiga sabab bo`lgan. Milliarderning Bavariyadagi ko`chmas mulki va “Dilbar” yaxtasida tintuvlar o`tkazilgan. Mazkur tergov va tintuvlar ommaviy axborot vositalarida yoritilgan va tadbirkorga nisbatan sanksiyalarni kengaytirish uchun ishlatilgan.
“Bank xizmatlari shartnomasi va bank sirini saqlash qoidalariga zid ravishda UBS mijozlar ma`lumotlarining maxfiyligini buzgan, yolg`on bayonotlar tarqatgan, shuningdek, umumiy shaxsiy huquqlarni qo`pol ravishda buzgan.
Bank tomonidan shartnomaning buzilishi Usmonovning obro`siga katta miqdorda zarar etkazilishiga va moliyaviy yo`qotishlarga olib kelgan. Aslida, UBS begunoh shaxsni qonunga xilof ravishda javobgarlikka tortishni, shuningdek, mijoziga nisbatan sanksiya qo`llashni qo`zg`atgan va yordam bergan”, — deydi advokat.
Tadbirkorning vakili Piter Gauvayler etkazilgan zarar miqdorini hozircha baholash yoki yakuniy aniqlash mumkin emasligini qo`shimcha qildi.
