O‘zbekiston Global Cybersecurity Index 2024da T2 Advancing - yaxshi rivojlanayotgan davlatlar qatoridan joy oldi, deya xabar bermoqda Raqamli texnologiyalar vaziri Sherzod Shermatov.
Bu yilgi Global kiberxavfsizlik indeksida mamlakatlarning kiberxavfsizlik tahdidlariga tayyorgarlik choralari 5 ta pog‘onaga bo‘lib baholangan (eng pastidan yuqorigacha: T5 Building - poydevori yaratilayotgan, T4 Evolving - shakllanayotgan, T3 Establishing - mustahkamlanayotgan, T2 Advancing - yaxshi rivojlanayotgan, T1 Role-modeling - namuna bo‘layotgan).
"O‘zbekiston avvalgi indeksga nisbatan o‘sib, T2 Advancing - yaxshi rivojlanayotgan davlatlar qatoriga kiritilgani mamlakatimizda bu sohaga ham alohida e’tibor berilayotganining o‘ziga xos tasdig‘i bo‘lib xizmat qiladi.
Albatta, xali bu yo‘nalishda amalga oshiriladigan ishlar juda ko‘p, ayniqsa raqamli texnologiyalar hayotimizga keng kirib kelayotgan davrda aholimizning barcha qatlamlarini kiberxavfsizlik tahdidlaridan ogoh bo‘lib, firibgarlarga ishonmaslik ko‘nikmalarini shakllantirish eng qiyin bo‘lgan vazifalardandir", - deydi vazir.
